5 månadar fengsel for «diverse straffbare forhold»
Ein mann i 50-åra, som var tiltalt for ei rekkje lovbrot i fleire av kommunane i Sunnhordland og Hardanger, har no fått dommen.
Publisert
Sist oppdatert
Tiltalte møtte og erkjente seg skyldig for alle forholda i tiltalebeslutninga, forutan ein av postane i denne. Dette punktet handla om at tiltalte hadde bore kniv på offentleg stad, noko som av tiltalte vart grunngjeve med at den var nytta i arbeid.
Etter retten sitt skjønn hadde ikkje tiltalte noko aktverdig formål for å bæra kniv på tidspunktet han vart pågripen av politiet, noko som førte til at han likevel vart domfelt for forholdet.
Annonse
Kniven vart vidare beslaglagt.
Redusert straff og bot
Tiltalebeslutninga innehaldt lovbrot innan forfalsking, oppbevaring av narkotika, føring av motorvogn utan gyldig førarkort, samt føring av motorvogn i berusa tilstand. Grunna skuldserkjenninga og åtte dagar i varetekt, fekk tiltalte frådrag i strafferamma som vart lagt til grunn.
Retten kom fram til at utgangspunktet for straffa burde vera 6 månadar fengsel, og grunna den ærlege tilståinga, som gav prosessøkonomisk gevinst, vart dette redusert til fem månadar.
Annonse
Han blir samstundes dømd til å betala 10.000 kroner i bot.
«Det er sett hen til at tiltalte har låg inntekt og dårleg økonomi. Til frådrag i straffa går 8 dagar for uthalde varetekt», står det å lesa i dommen.
Per Ivar Hessen var tiltaltes forsvarar, og dommen fall onsdag 28. september.
