42 frivillige organisasjonar har søkt om straumstøtte

Laga som har meldt om dei høgaste utgiftene til straum i månadane desember og januar er Sunnhordland folkehøgskule, med 68.586 og 81.713 kWt, Sunde båtlag, som brukte 15.319 og 16.030 kWt desse månadane, samt Husnes båtlag, som meldte om eit forbruk på16.066 kWt i desember og 13.528 kWt i januar.

Dei andre frivillige organisasjonane som søkte på straumstøtteordninga brukte mindre enn 10.000 kWt per månad i desember og januar. Oversikta for ordninga er presentert på Lotteri- og stiftelsestilsynet sine sider.

Både regjeringa og Kvinnherad kommune kan etter at portalen stengde 15. mars, melde om feil i søknadane og i søknadsportalen.

Presiseringar rundt søkebeløp og -portal

I eit brev vedrørande straumstøtteordninga for frivillige organisasjonar kom regjeringa med følgjande presisering den 18. mars:

«I det nasjonale søknadsskjemaet ser vi at ein del søkjarar har oppgitt feil søkebeløp ved at dei har inkludert ører i oppgitt forbruk. Det vil sei at i staden for å søkje om tilskot for eit forbruk på 1234,56 kWt har dei søkt om 123456 kWt. Det er eit resultat av enkel tastefeil, men det får store konsekvensar for utrekninga av tilskotet.»

Kristian Helgesen, som har handsama søknadane frå dei frivillige organisasjonane i Kvinnherad, fortel til Grenda at desse feila har dei vore medvitne om og teke hand om i søknadsprosessane.

– Søknadsportalen var ei hurtig løysing som også gjorde at enkelte av søknadane vart registrert 2-3 gonger. Desse feila fekk vi korrigert i samråd med dei det gjaldt før søknadsfristen, seier han.

Kvinnherad kommune ynskjer fleire søknadar om straumstøtte frå frivilligheita

Følgjande organisasjonar søkte på ordninga innan fristen:

Husnes ungdomslag, Rosendal Båtlag, Arbeidsgruppa valeparken, Vareld skyttarlag, Kvinnherad skyttarlag, Husnes Indremisjon, Interesselaget for Galeas Gurine, Sunnhordland folkehøgskule, Omvikdalen ungdomslag, Kvinnherad roklubb, Valedamene, Trio Idrettslag, Rosendalstiftinga, Halsnøy Idrettslag, Kvinnherad motorsportklubb, Idrettslaget Ternen, Sandvoll ordskiftelag, Hatlestrand og Ølve skyttarlag, Uskedalen bedehusforsamling, Løfallstrand bygdalag, Interesselaget Vangssago, Varaldsøy bygdalag, Uskedal båtlag, Uskedal Idrettslag, Hatlestrand gamleskuleforeining, Ungdomslaget hatlestrendingen, Husnes båtlag, Uskedal ungdomslag, Matre indremisjonsforening, Uskedalen utvikling, Rosendal Indremisjon Rosendal bedehus, Utåker bygdalag, Halsnøy kulturhus velforening, Kvinnherad golfklubb, Opsangervågen kystlag, Gjetingsdalen grendalag, Amcar Kvinnherad, Opsangervågen kystlag, Fjellhaugen skisenter AS, Sunde båtlag, Rosendal turnlag og IL Strand-Ulv.