41 svindla i Kvinnherad i år

«SpareBank1 SR-Bank slår seg saman med SpareBank 1 Sørøst-Norge 1.oktober, og blir til SpareBank 1 Sør-Norge. Difor meiner me det er ekstra grunn til å vera på vakt no. Svindlarane bruker ofte endringar til å prøva å lura våre kundar», skriv Christiansen i ei pressemelding.

Det var 10 personar i Kvinnherad som vart svindla berre i august, og i løpet av året totalt er det 41 kvinnheringar som har opplevd svindel.

– Og då er ikkje kortsvindel-tala teke med. Desse tala viser såkalla «fishing»-svindel, til dømes å få tilsendt ei lenke på epost som svindlarane håpar ein skal trykka på, fortel Christiansen på telefon.

Lett å stoppa

Det vert sett nye rekordar for antal svindelforsøk kvar månad. Svindelmetodane vert meir og meir avanserte, og ein lyt vera svært bevisst på korleis ein betalar på finn eller tise, eller kva lenker ein trykker på. Ein bør også vera sikker på at personar som utgjev seg for å koma frå banken eller politiet, faktisk er det.

«Svindelfaren er dessverre mangedobla på kort tid. Trøsta er likevel at det er relativt lett å stoppa det aller meste», skriv Christiansen.

Hugseregelen «stopp, tenk, sjekk» vert tilrådd av banksjefen, og han samanliknar det med å bruka ein redningsvest. Han tilrår også å spørja nokon andre om ein får førespurnadar som handlar om pengar.

Aldri dela BankID

No skal altså SR-banken fusjonera, og det meiner Christiansen er ein opplagt risikofaktor, sidan kundane i ein endringsfase lettare kan tru på folk som utgjev seg for å vera frå banken.

«Ver trygg på at banken aldri vil kontakta kunden om mistenkelege transaksjonar eller hendingar. Me vil derimot sperra kontoen umiddelbart, og iallfall aldri be om BankID, personnummer eller andre sensitive opplysingar. Du skal aldri gje BankID til nokon. Korkje banken, ektefellen eller andre», avsluttar han.