30 millionar skal redda julegudstenestene i Sør-Norge
Fleire kyrkjelege instansar har vore redde for at kyrkjene må halda stengt eller redusera aktiviteten i advents- og julehøgtida grunna dei høge straumprisane. No blir bøna deira høyrt.
Publisert
Sist oppdatert
Regjeringa kom nemleg før helga med eit forslag for ei mellombels tilskotsordning på 30 millionar kroner til kyrkjebygg i Den norske kyrkja i 2022, for slik å bidra til at publikum kan få ei fin høgtid trass dyr straum.
– Regjeringa er opptatt av å leggje til rette for å halde kyrkjer og kyrkjerom opne og tilgjengelege, særleg i advents- og julehøgtida. Derfor føreslår vi no ei mellombels straumstøtteordning, slik at kyrkjer kan halde opent som vanleg i ei høgtid som betyr mykje for mange menneske, seier barne- og familieminister Kjersti Toppe (Sp) i ei pressemelding.
Annonse
Sør for Dovre
Det er kyrkjene sør for Dovre og Sognefjorden som vil kunne søkja tilskot frå ordninga. I praksis gjeld dette 1034 kyrkjer som ligg innanfor dei dyraste prisområda, og det er fellesråda i dei aktuelle områda må søkja Barne- og familiedepartementet om støtte.
«Tilskotsmidla vil bli fordelt ut i frå talet på sokn i fellesrådet. Nivået for støtta per sokn vil vera lik for alle, og det er ei føresetnad at midlane utbetalast i løpet av 2022. Vi tek såleis ikkje omsyn til storleiken på kyrkjerommet eller nivå på straumutgiftene for det enkelte bygget», heiter det i omtalen av den mellombelse straumstøtteordninga.
