30-åring legg alle korta på bordet: – Eg inngjekk ei pakt med djevelen

– Det er fleire årsaker til at det gjekk som det gjekk. Eg har lyst til å fortelja retten om det eg har gjort, og ugjerningane mine. Og eg er villig til å ta ansvar.

Slik opnar ein 30 år gammal albanar forklaringa si i Hordaland tingrett onsdag formiddag.

Han understrekar overfor retten at han er nervøs, og at han aldri før har vore i ein liknande situasjon.

Vedgår alt

30-åringen var tysdag den einaste som erkjente straffeskuld etter tiltalen, etter smuglarsaka på Husnes i fjor. Onsdag understrekar han at han legg alle korta på bordet.

150 kilo nesten rein kokain blei teke i land frå eit skip i april i fjor. Politiet slo til, og dei neste vekene sit fem albanarar, fire menn og ei kvinne, på tiltalebenken i Hordaland tingrett.

Blodhemn

Den 30 år gamle mannen fortel om ei bilulukke i mars 2022, der far hans var involvert. Den andre parten hamna på sjukehus.

– Han omkom heldigvis ikkje, for i Albania er det ikkje uvanleg med blodhevn, seier 30-åringen.

Så gjer han greie for sjukehussystemet i Albania, og at det ikkje er som i Norge.

– Eg tok på meg ansvaret for sjukehusopphald og behandling for den fornærma. Og i Albania er systemet sånn at me må ta oss av 80 prosent av sjukehusutgiftene sjølv, seier mannen.

Privat lån

Han fortel at han lånte 5.000 euro av ein annan person, til ei rente på ti prosent. På grunn av at han ikkje hadde fast inntekt så fekk han ikkje lån i banken. Far hans er sjuk, og oppfylte heller ikkje kriteria for banklån, får retten høyra.

– Eg trudde at eg bidrog til å løysa eit problem då eg tok opp det private lånet. Det eg ikkje visste då var at eg påførte meg sjølv eit endå større problem, seier mannen.

Han beskriv lånet som å inngå ein pakt med djevelen – og starten på eit helvete.

– Så lenge eg hadde råd til å betala avdraga, dei to første månadene, så var stemninga vennleg. Når pengane uteblei så kom trugsmåla, seier han.

Gravid

På dette tidspunktet så var 30-åringen si kone gravid med paret si dotter, som i dag er halvtanna år gammal.

– Svangerskapsundersøkingane var dyre, så pengane strakk ikkje til. Den økonomiske situasjonen var vanskeleg. Eg blei truga med at dei ville ta ting frå huset mitt. Albania er eit vakkert og fint land, men på fleire område fungerer landet som ein «jungel», seier 30-åringen.

Då han berre hadde 1.000 euro att å betala på lånet tok han opp eit nytt lån på 3.000 euro, utan renter. Så skal oppdraget på Husnes ha dukka opp.

– Eg skulle få 20.000 euro for å frakta nokre bagar frå A til B. Etter fråtrekk på 3.000 euro så skulle eg sitja att med 17.000 euro. Jobben skulle vera gjort på to minutt, var beskjeden. Og her sit eg no. Eg har begått den største feilen i livet mitt.

Vil ikkje røpa namn

30-åringen er tydeleg i retten på at han ikkje ønskjer å oppgje namn på kontaktane han lånte pengane av, og som sende han til Norge.

– Det beklagar eg, overfor alle her. Men eg er redd for represaliar, og er ikkje i stand til å beskytta familien min i Albania, seier han.

Mannen gjer greie for korleis han blei sett i kontakt med den sjette sikta i saka – ein mann i 40-åra, som døydde i Agder fengsel før jul. Han fortel om korleis dei reiste til Norge, korleis dei henta utstyr og planla dykket og flyttinga av kokainforsendinga.

– Eg reiste ikkje til Norge med ein intensjon om å innføra narkotika til landet. Oppdraget mitt var å flytta bagane frå vasskanten og over i bilen, seier han.

Og legg til:

– Eg blei ein del av ei jævlig gruppe.

Kvar stoffet kom frå, og kor mykje det var, hadde ikkje 30-åringen kjennskap til, seier han i retten.