250 skal delta på sikkerheitsseminar
Valen sjukehus er denne veka vertskap for det nasjonale sikkerheitsseminaret, som samlar over 250 fagfolk frå heile landet. Seminaret går av stabelen i Riddersalen i Rosendal.
Publisert
Sist oppdatert
Bak Sikkerheitsseminaret 2024 står SIFER, som er eit nasjonalt kompetansesenternettverk i sikkerheits-, fengsels- og rettspsykiatri.
«Sikkerheitsseminaret har ein lang tradisjon, og har som hovudfokus å belysa fagfeltet sikkerheits-, fengsels- og rettspsykiatri. I 2023 var sikkerheitsseminaret i Bergen, no er det Helse Fonna og Valen Sjukehus sin tur», vert det opplyst på deira heimeside.
Annonse
Seminaret vert skipa til onsdag og torsdag denne veka. Då kjem over 250 deltakarar til Rosendal, noko som gjer at all overnattingskapasitet i bygda er oppteken. Møta skal vera i Riddersalen til Baroniet, medan festmiddagen vert på Fjordhotellet.
Årets tema er «Framtidas sikkerheitspsykiatri - nye løysingar for nye tider».
«På programpostane finn vi innlegg frå fagpersonar frå Helse Fonna, Helse Vest RHF, Vest politidistrikt, Helse Bergen og fleire andre helseføretak, Statens Helsetilsyn, UKOM og Haugesund kommune. Og sist, men ikkje minst, så bidreg ei rekkje medarbeidarar i Helse Fonna med sin fagkunnskap», opplyser Helse Fonna i ei pressemelding.
Føredrag
Annonse
Statssekretær John-Erik Vika i Justis- og beredskapsdepartementet skal innleia fagseminaret med innlegget «Forventningar til utvikling av tenestetilbodet, og sikkerheitsavdelingar sitt ansvar for samfunnsvern og bekjemping av kriminalitet».
Blant dei lokale føredragshaldarane og paneldeltakarane er Torill Storhaug, Monica Lindseth, Espen Åkra Seberg, Kjersti Ytrehus, Maren Skogseth, Sigurd Børve, Glenn André Opland og Tone E. G. Henriksen.
