250 pasientar i Rosendal får fastlege på Hatlestrand og Halsnøy
58 innbyggjarar som har hatt fastlege i Rosendal, er no flytta over til Hatlestrand helsesenter. Snart skal ytterlegare 200 flyttast til Halsnøy. Men kommunedirektøren vonar dette berre er mellombels.
Publisert
I kommunestyret på torsdag opplyste Silvia Tofte at Høgre har blitt kontakta av innbyggjarar som fortel at dei har blitt flytta frå Rosendal helsesenter til fastlege på Hatlestrand helsesenter.
– Dette er pasientar som det siste året har hatt vikarlegar etter at fastlegen deira gjekk av med pensjon. Det er menneske som er sjuke, og som no må reisa lengre for å koma til legen. Kva kan ein gjera for å få auka opp kapasiteten på Rosendal helsesenter? spurde Tofte.
Annonse
Nyutdanna legar
Kommunedirektør Leif Ove Mikkelsen svarte at problemstillinga heng saman med at kommunen nyleg har rekruttert nyutdanna legar. Det er nemleg slik at etter oppstart av praksis, skal desse legane ha fem år med spesialisering før dei får tittelen «Spesialist i allmennmedisin». I desse åra går dei 100% som fastlegar, i tillegg til å ha legevakt kvar 14. dag.
– Samtidig er dei under eit ganske krevjande utdanningsforløp. Av den grunn kan ein ikkje forventa tilsvarande lister som når ein hadde sjølvstendig næringsdrivande som legar. Då var det oppi 2000 pasientar på ei liste i enkelte tilfelle. Dei listene som tidlegare blei betjent av éin godt erfaren lege, må ein no rekna med må delast på 1,5 nyutdanna legestilling, sa Mikkelsen, og understreka at dette ikkje er unikt for Kvinnherad.
Kommunedirektøren fortalde at hittil er 58 pasientar flytta frå fastlege i Rosendal til Hatlestrand helsesenter. I november ligg det an til at ytterlegare 200 må flyttast til Halsnøy helsesenter. Ifølgje Mikkelsen er det ikkje Kvinnherad kommune som står for utveljinga av kven som må til Hatlestrand.
Annonse
– Det er Helfo (Helsedirektoratet sin ytre etat) som nærast etter Lotto-metoden tek og vel ut desse, sa han.
Nytt legekontor
Leif Ove Mikkelsen informerte vidare at målsetjinga er at flyttinga skal vera mellombels, då Rosendal helsesenter vonleg får eitt legekontor til.
– Legekapasiteten i Rosendal må styrkast. Dette med kontorløysing skal bli løyst ganske snart, slik at vi kan gå til rekruttering. Så dette skal vera ei mellombels problemstilling, avslutta kommunedirektøren.
