232 millionar i pluss i første halvår
Sunnhordland Kraftlag (SKL) sin halvårsrapport viser eit driftsresultat på 232,2 millionar kroner etter skatt for første del av 2024. Det om lag 100 millionar ned frå i fjor.
Publisert
Sist oppdatert
Første halvår 2023 gav eit resultat på 330,4 millionar kroner. I ei pressemelding i samband med halvårsresultatet blir det peika på lågare prisar som hovudårsaka til nedgangen i driftsresultat.
– Snittprisen i prisområdet SKL har mesteparten av straumproduksjonen, NO2, var 62,9 øre/kWh, medan i tilsvarande periode i 2023 var den 107,0 øre/kWh. Kraftmarknaden har i aukande grad vore påverka av uregulert kraftproduksjon i 2024. Det har gitt variasjon i prisane, også negative prisar, skriv SKL i pressemeldinga.
Annonse
Tredje beste halvårsresultatet
– Dette er eit godt halvårsresultat, det tredje beste i SKL sin historie. Kraftprisane var framleis høge første halvår i år, men dei nærmar seg meir og meir prisnivåa me hadde før kraftpriskrisa i 2022. Det er bra for næring og privatpersonar, seier administrerande direktør i SKL John Martin Mjånes i pressemeldinga.
Han meiner resultatet også reflekterer god drifta hos SKL.
– Me har jamt god innsats og kompetanse hos våre tilsette. Anlegga vert haldne godt ved like og er i stand til å produsera når det trengst, me disponerer vassmagasina klokt og me har lågt sjukefråvær, analyserer Mjånes.
Annonse
SKL gjorde investeringar på 129,4 millionar kroner første halvår 2024, i tillegg til finansielle investeringar og utlån i andre selskap på 42,6 millionar kroner. Løkjelsvatn Kraftverk i Etne, som har vore under bygging sidan 2018, vart sett i prøvedrift i juni.
Høgprisbidraget borte
Kraftverket erstattar produksjonen frå tre aggregat i to kraftverk, og er venta å gi netto ny produksjon på 20 GWh, samtidig som det doblar effekten i anlegget til 60 MW, går det fram i pressemeldinga.
Ein kombinasjon av fleire kraftstasjonar i drift, auke i tilsette og generell prisstigning har auka lønn og driftskostnadane til SKL. Dei utgjorde 85,3 millionar kroner første halvår, mot 72,4 millionar kroner året før. Med bortfallet av «Avgift på kraftproduksjon», det såkalla høgprisbidraget, gjekk totale driftskostnadar ned til 304,6 millionar kroner, mot 431,4 millionar kroner i tilsvarande periode i 2023, skriv SKL.
