215 millionar i pluss i første kvartal

Hydro Husnes melder om stabil drift i første kvartal, samt investeringar for framtida då dei onsdag presenterte resultatet for første kvartal 2024.

– Me har eit overskot før renter, skatt og avskrivingar på 215 millionar kroner, melder fabrikksjef Jon Ola Ystgaard i samband med kvartalsrapporten.

Usikker marknad

Han peikar på at aluminiumsmarknaden i Europa framleis er usikker, og det gjer at Hydro Husnes held fram med å produsere med redusert kapasitet.

– Den lågare etterspurnaden saman med lågare prisar på sal av både aluminium og overskotskraft har ein negativ effekt på resultatet, samanlikna med første kvartal i 2023, melder han.

Verket i Kvinnherad leverer først og fremst produkt til den europeiske byggebransjen og bilindustrien.

– Me merkar godt at prisane på råvarer og andre innsatsfaktorar har stige mykje dei siste par åra, medan etterspurnaden og prisane på aluminiumprodukta våre har gått ned. Me har derfor stort fokus på forbetringsarbeid og å redusere dei kostnadene vi sjølv kan påverke. Vi gler oss over å sjå resultat av dette arbeidet, seier fabrikksjef Jon Ola Ystgaard i samband med kvartalsrapporten.

Investeringar i framtida

Som Grenda skreiv om i mars fatta Hydro avgjerda om å investere nye 225 millionar kroner i full teknologi oppgradering av alle elektrolysecellane på Husnes. Arbeidet er i gang, og dei første oppgraderte omnane i A-linja blir starta opp igjen i slutten av april.

Samtidig går det føre seg andre prosjekt for å førebu verket for framtida, mellom anna ny tappeverkstad til 87 millionar og elektrifisering av køyretøyparken i elektrolysehallane, opplyser Hydro Husnes.

– Me trur den europeiske marknaden for lågkarbonaluminium vil vera god på lengre sikt, og me er i gang med fleire prosjekt for å modernisera anlegget. Viktig for framtida til Hydro Husnes er òg semja som tidlegare i år vart oppnådd mellom regjeringa og industrien om forlenging av CO2-kompensasjonsordninga for 2024-2030, seier Ystgaard i kvartalsrapporten.

Han meiner ordninga påskundar avkarbonisering og grøne investeringar.

– Framover er det avgjerande at Noreg utviklar nok fornybar kraft til å gjere nye investeringar og klimatiltak i industrien mogleg. Med gode rammevilkår kjem Hydro Husnes til å vere ein attraktiv arbeidsgjevar og lokal lagspelar også i tiåra som kjem, samtidig som vi yter viktige bidrag til det grøne skiftet, seier Ystgaard.