20 nye deltakarar i den 46. runden av fjelltrim

Tal frå Rosendal turnlag sin tradisjonsrike fjelltrim er klare, og i år var det 92 personar som melde seg på og fullførte.

20 deltakarar har besøkt alle dei ti turmåla; Malderskin, Malmangernuten, Nordlifjell, Skeidsfjell, Skålafjell, Gamlestølen, Høyklepp, Kjeldestøl, Myrdalsvatnet og Sanden inst ved Myrdalsvatnet.

Mange av deltakarane går turane fleire gonger. Til dømes har Geir Instanes vore ni gonger til Melderskin, 15 gonger til Malmangernuten og 47 gonger til Myrdalsvatnet.

Tre deltakarar kan også skilta med å ha vore med kvart år fjelltrimmen har eksistert, noko den har gjort i 46 år. Det er Magne Hus, Erling Bøhn og Morten Nygård.

Tre tilfeldige deltakarar er trekte ut, og dei har vunne gåvekort hos Sport1 i Rosendal. Dei heldige er:

Christine Dekke

Jostein Eik

Mie Astrid Prestsveen Gaustad

Slutt på det digitale

– Det er kjekt å sjå at vi har 20 nye deltakarar som har fullført trimmen for første gong. Vi veit at den såkalla Postkassetrimmen med registrering digitalt har gjort at mange har meldt seg på trimmar, og har opplevd det som ein motivator for å koma seg ut på tur, skriv fjelltrimansvarleg Laila Hovland i ein e-post til Grenda.

2024 er derimot siste året for den digitale Postkassetrimmen.

– Vi veit at Rosendal Fjelltrim vil halda fram også i 2025, men akkurat korleis vi skal leggja det opp veit vi ikkje enno. Kanskje det blir papirkort igjen, legg Hovland til.

Framleis er det bøker på fleire av turmåla, men fjelltrimansvarleg fortel at det etter pandemien viser seg at mange har slutta å skriva i bøkene.