17-16 for Fjelbergsambandet
Den mest dramatiske avrøystinga i kommunestyret førre veke kom i saka om lån til Fjelbergsambandet AS.
Publisert
Sist oppdatert
I 2017 vart pådrivarselskapet Fjelbergsambandet AS etablert. Føremålet er å jobba for å realisera Fjelbergsambandet med bru mellom Sydnes og Fjelbergøy, og endå ei bru mellom Fjelbergøy og Borgundøy. Aksjekapital var på 4,6 millionar kroner, av det kom 3,5 mill. frå Kvinnherad kommune. Dei andre aksjonærane er Fjelberg Fjordbruk AS (1 million) og Fjelberg Bygdalag (100.000 kroner).
Arbeidet med reguleringsplanen er betalt av kommunen, men det har vore intensjonen at kostnadane skulle samlast i pådrivarselskapet. Årsaka er at ein forventar at kostnadene knytt til planarbeidet vert refundert av Vestland fylkeskommune ved realisering av prosjektet.
Annonse
Berømma
I 2018 betalte Fjelbergsambandet AS 2,6 millionar kroner i påløpne plankostnader. Men sidan den gong har det påløpt kostnader på ytterlegare 3.054.312 kroner eks. moms. For at Fjelbergsambandet AS skal kunne dekka dette må selskapet styrkast finansielt. Kommunedirektøren la difor fram forslag om at kommunen gjev eit avdragsfritt lån på 3,3 millionar kroner. Løpetida er fem år. Dette vart samrøystes vedteke i kommunestyret.
– Eg ynskjer å berømma dei som er involverte i prosjektet. Det er viktig at vi fortset med same driven, og får gjennomført planforslaget i løpet av hausten, sa Stig Arild Fosse (H), som sjølv er frå Fjelberg.
Omstridd
Annonse
På vegner av Høgre føreslo han to tilleggspunkt. Dei eine lydde: «Kommunestyret har tidlegare vedteke at Fjelberg-prosjektet skal ha høgast prioritet i plansamanheng. Dette må føljast opp slik at ferdig planforslag vert lagt fram til handsaming i kommunestyret i løpet av hausten 2024». Dette tidskravet vart omstridd.
– Dette kan føra til at anna planarbeid blir nedprioritert, og vi klagar stadig over forseinka planar. Vi støttar at det er viktig med denne planen, men synest ikkje det er riktig å pusha den føre andre planar, sa Per Harald Havnen Löfgren Johansen (Ap).
Men med knappast mogleg margin, 17-16 etter fleire kontrollteljingar, fekk Høgre og Fosse fleirtal. Høgre sitt andre punkt fekk derimot full tilslutnad. Det handlar om at kommunen skal krevja attende alle utlegg gjennom dei utbetalingar ferjeavløysingsordninga gir etter gjennomføring av prosjektet.
