150 meter breitt ras over stien ved Bondhusvatnet
Fredag kveld gjekk det eit stort ras Bondhusvatnet. Det er ikkje meldt om sakna personar i området og det er ingen indikasjon på at nokon er tekne av raset.
Publisert
Sist oppdatert
Det er Kvinnherad kommune som melder om raset på sine nettsider.
– Det er eit stort ras over stien som går langs med Bondhusvatnet. Raset har teke med seg store steinblokker som har havna i vatnet og på stien. Raset er om lag 150 m breitt. Det er ikkje meldt om sakna personar i området og det er ingen indikasjon på at nokon er tekne av raset, skriv kommunen.
Annonse
Det er mogleg å gå opp til Bondhusvatnet, men ikkje inn på stien som går på vestsida av vatnet. Det er i dette området raset har gått.
– Politiet har sett opp sperreband for at ingen skal gå inn i rasområdet. Det vert også skilta ved parkeringa nede i Sunndal. Vegtrafikksentralen er varsla og vil syta for naudsynt skilting ved hovudvegen. Geolog er varsla, men vil nok ikkje kunna koma på plassen før etter helga, opplyser kommunen i si melding.
Rune Mikkelsen frå Statens naturoppsyn var på synfaring til rasstaden ved Bondhusvatnet i helga.
«Det har rast ned noko stein og blokk på stien langs vatnet. I tillegg er nokre tre og vegetasjon skada. Området med rast stein strekker seg over eit lite stykke langs stien. Det er mogleg å passere steinane, men enkel opprydding vil vera bra», opplyser han i ein e-post.
