125.000 i bot etter promillekøyring

I november i fjor vart mannen stoppa av politiet i Kvinnherad. Blodprøven tatt 70 minutt etter køyringa viste ein alkoholkonsentrasjon på 2,85 promille, går det fram av domsavseiinga i Haugaland og Sunnhordland tingrett.

Mannen i 60-åra har tilstått utan atterhald, og har i retten forklart at han drakk etter køyringa.

– Den rettstoksikologiske undersøkinga byggjer på eit inntak på 4,5 dl etter køyringa og konkluderer med at han hadde ein promille på minst 1,11 og mest sannsynleg rundt 1,3 promille. Retten kjem etter dette til at det er prova utover ein kvar rimeleg tvil at tiltalte hadde over 1,2 i promille, står det i domsavseiinga.

Retten fann at dommen skal setjast ned frå 27 til 24 dagar grunna tilståinga hans. I straffeutmålinga legg retten vekt på at tiltalte har køyrd i eit trafikkert område på eit tidspunkt på døgeret då det er mange som ferdast ute, både i bil og til fots. Dei 24 dagane i fengsel blir utsett med to års prøvetid, mot det særvilkåret at den domfelte i prøvetida skal gjennomføra program mot ruspåverka køyring. I tillegg kjem bota på 125.000 kroner og tap av førarretten i to år.