118 mill. til naturtiltak
Alle kommunar og fylkeskommunar kan no søkja staten om tilskot til ulike naturtiltak.
– Kommunane har eit stort ansvar for å ta vare på naturen og sikra at belastninga frå menneskeleg aktivitet ikkje er større enn villrein, villaks og andre artar kan tåla. Fjorårets utlysing sette for eksempel i gang viktig arbeid med planvask i mange kommunar. No kan dei igjen søkja om støtte til dette, seier klima- og miljøminister Andreas Bjelland Eriksen (Ap) i ei pressemelding.
Gjennom ordninga Natursats kan kommunane få støtte til planlegging, gå gjennom gamle arealplanar, og tiltak som betrar naturmangfaldet. Potten i år er på 118 millionar kroner. Ei nyheit i år er midlar til tiltak i kommunar eller fylkeskommunar som ynskjer å bli arealnøytrale. Enkelt forklart betyr det at dersom du byggjer ned natur på eitt område, må du syta for å forbetra naturmangfaldet i eit anna område.
Annonse
– Vi oppmodar kommunane til å setja seg mål for å redusera nedbygginga. 80 kommunar har no sett seg eit mål om arealnøytralitet, og eg håpar fleire vil koma etter, seier Bjelland Eriksen.
Det er Miljødirektoratet som forvaltar Natursats-ordninga, og fristen for å søkja er 1. februar.
