10,5 mål industriområde på Sunde skiftar eigar

Svein Langeland kjøpte området han no sel i 2007.

– Me kom no til at me ynskte å jobba med andre ting enn utleige, og at det var ei tid for alt – og så har ein jo sett i passet at ein ikkje er heilt ny lenger. Så me har bestemt oss for å selja, og heller bruka tida på å driva bedrifta vår Seismeq, og vera leigetakarar her i staden, seier Svein Langeland.

Han er glade for at det blei lokale eigarar når han sjølv selde.

– Og eg er glad at heile området her kan utviklast ved at det eit mangfald med fleire eigarar på dette industriområdet. Her har vore mange gründerar i dette området tidlegare, og eg håper og trur at dette vil vera ein plass kor småbedrifter kan få etablera seg i framtida også, seier Langeland.

Flyttar ikkje Into

Into-eigarane Tore Voster og Thomas Aspmo er kjøparane, men dei presiserer at kjøpet ikkje heng saman med drifta av Into Røyr og Elektro.

– Me har laga vårt eige selskap som kjøper aksjane i Maritim Eigedom

Verven Holding AS, der Tore og Thomas har 50 prosent kvar.

– Me såg annonsen om at det var til sals, og såg at det kan vera ein mogelegheit til å utvikla området, men på utleigebasis. Me satsar ikkje på å vera her sjølve pr. i dag, seier Terje.

Into Røyr og Elektro har basen sin kring 250 meter i luftlinje frå industriområdet, og Aspmo og Voster har fri sikt frå kontorstolane sine til arealet dei har kjøpt.

– Me får sjå kva framtida bringer, men me har ingen intensjonar om å flytta på oss enno, seier dei.

Partane tykkjer ikkje det var vanskeleg å bli einige, men det gjekk tre-fire månader på å koma i mål.

– Eg vil seia at det var ein ganske normal prosess, som brukte den tida det tar, meiner Langeland.

Det var det at arealet kom til sals som utløyste planane om utleigeaktivitet for Voster og Aspmo.

– Det var at dette kom til sals, i nabolaget vårt, som fekk oss på banen, og vidare fekk oss til å sjå på kva me kunne gjera med dette industriområdet, seier dei nye eigarane.

Nye leigetakarar

Seismeq til Svein Langeland er ein i alt åtte leigetakarar på området. Keller Geoteknikk, som er eit dotterselskap av Keller Group i London, blir ny leigetakar på området.

– Keller er eit av verdas største fundamenteringsselskap. Me etablerte oss i Norge i 2019 med hovudkontor i Oslo, fortel Morten Slåtta.

Dei er både på land og på sjø, og det er satsinga på det siste som har brakt dei til Sunde.

– Me har kjøpt to lekterar som me har modernisert, som nett no er i arbeid i Nord-Norge. Sunde blir ein mellombase for dei, og ei strategisk plassering på grunn av dei gode hamnetilhøva og i forkant av store prosjekt som kjem i regionen, som Hordfast og Sotralink.

Sunde er andre avdelinga deira i Norge. Seinare er planane å etablera ein tredje avdeling i nord, for å ta seg av området nord for Trondheim. Har kontor i Rosendal, med tre tilsette.

– Her er det både uteområdet, verkstad og eine hallen som me skal leiga, og nytta til vedlikehald og reperasjonar av maskinar. Me skal også lagra pælar og spunt her, så me treng litt plass, legg Slåtta til.

Ser potensial

Svein Langeland si bedrift Seismeq skal halda fram og ha kontor og verkstad på industriområdet.

– Eg ser ikkje at me skal trenga meir enn det me har, vurderer han om den tre mann store bedrifta.

Arealet er 10,5 mål, byr på 74 meter med kai og rommar 2200 kvadratmeter bygningsmasse.

– Me har litt ledig areal, om det er nokon som treng, reklamerer Voster og viser til at dei har 640 kvadratmeter hall og 80 kvadratmeter verkstad ledig.

Spesielt tilgjenget til sjø er høgt verdsett av både kjøpar og seljar.

– Det er mangel på sjøareal, og det skal mykje til for at det blir bygt nye av denne typen, meiner Langeland.

– Kaiar blir det mindre av, fleire blir brukt til husvære, påpeikar Aspmo.

– Noko av grunnen til at me vurderte vår tid som utleigar til å vera omme, er at det er ein jobb som tar tid. Vedlikehald og oppgradering passa dårlegare og dårlegare for oss å ha som ekstrajobb i tillegg det andre arbeidet me har i Seismek.

Sju-åtte-ni leigetakarar som skulle ha si oppfølging, påpeikar han.

– Me veit det betyr meir jobb, men me ser potensialet i dette og ser at det er mogelegheiter her, sluttar Aspmo og Voster.