101 turglade på leir på Halsnøy

Det var den tverrkyrkjelege friluftsorganisasjonen Tråkk som stod bak arrangementet. Tråkk vart starta i 1998 i Stavanger, og har i dag også lokallag i Bergen, Oslo, Sørlandet og Trøndelag.

– Lokallaga arrangerer turar, til dømes bålturar, dagsturar og helgeturar. Peronar frå lokallaga dannar så ein komité som kvart år skipar til ein fellestur i veke 30. I 2018, i høve 20-årsjubileet, slo vi på stortromma og reiste til Lofoten, fortel Maria Sørhus.

Tru og tvil

Då ho møtte Grenda fredag ettermiddag, kom ho rett frå tur til Bjellandsneset med pannekakesteiking på stormkjøken. Dagen før hadde kanotur med pannekaker vore eine alternativet. Gjengen har også hatt omvising på Halsnøy kloster og gått kulturstien i området. Dei har også vitja Bondhusdalen og terrenget rundt Valen. Men dei 101 deltakarane har i tillegg kunna bryna seg på lengre og tøffare turar, til dømes Melderskin, Malmangernuten og Ulvanåso, Langs Sørfjorden har både Dronningstien, Via Ferrata og Trolltunga stått på programmet, og på Stord har det vore tilbod om Kattnakken og Stovegolvet.

– Vi har fokus på dagsturar med varierande vanskegrad. Folk kan også slappa av, viss dei ynskjer det. Vi startar turane våre med ei lita bønn. I lunsjpausen har vi «Ord for dagen», som gjerne er eit bibelvers og eit spørsmål til samtale og refleksjon. Det kjennest naturleg og fint å løfta blikket ilag og samtala om tru og tvil når ein er på tur i skaparverket. Å kunne gjera det, gjev ein ekstra dimensjon til turane og fellesskapen, seier Sørhus.

Ikkje alkohol

Deltakarane var i aldersgruppa 25 til 45 år. Dei kom frå ulike kristne miljø.

– At folk kjem frå forskjellige miljø, gjer at vi har ulike typar song og musikk og andaktshaldarar med sine perspektiv. Nokon av deltakarane bur i større byar og har eit kristent nettverk rundt seg, andre er frå mindre stader utan slikt nettverk. Det er difor godt å koma saman i eit trygt og inkluderande fellesskap – utan alkohol. Men ein må ikkje vera kristen for å vera med, opplyser Maria Sørhus, som på leiren var medlem i åndeleg komité og turleiar.

Under opphaldet på Halsnøy budde nokon i telt, resten i internatet til folkehøgskulen. Om kveldane var det felles grilling og kveldsmøte med andakt, song og musikk. På programmet seinare på fredagen, stod pizza, grunnleggjande svingkurs og dans utover kvelden.

Særs god PR

– Kvifor vart det Halsnøy i år?

– Det er mykje spennande natur i Sunnhordland. Turkomiteen tenkte at her kan ein velja både rusleturar og meir krevjande terreng. Deltakarane seier at det er veldig fin natur her, og opplegget har vore kjempebra. Vi er veldig nøgde med tilrettelegginga frå personalet på folkehøgskulen. Dei har vore svært hjelpsame, positive og fleksible, rosar Maria Sørhus.

Rektor Bente Sjo vil gjerne returnera godorda.

– Det var ein enormt godt organisert leir, synest vi som såg det frå sidekanten. Dette er særs god PR for kommunen vår, vurderer ho.