1,0 prosent arbeidsløyse i februar

I februar registrerte NAV 1,3 prosent heilt ledige i Sunnhordland og ein nedgang på 25 heilt ledige personar i høve januar. Totalen av alle arbeidssøkarar, det vil seie dei heilt ledige, delvis ledige og ledige på tiltak, aukar likevel med 139 personar mot månaden før.

Kommunen med høgast arbeidsløyse i februar er Bømlo (2,1 %), medan den er lågast i Stord kommune (0,9 %). Snittet for Sunnhordland er 1,3 prosent, som er lågare enn både Vestland fylke (1,9 %) og landet som heilskap (2,1 %). I Kvinnherad er talet 1,0 prosent.

Permitteringar

– Den største auken ser me i tal delvis ledige. Auken skuldast permitteringar, kommenterer leiar i Nav region Sunnhordland Håvard Lægreid i samband med månadstala frå Nav.

– Permitteringar er i utgangspunktet ein mellombels situasjon, og me ventar at arbeidsløysa vil stabilisere seg på eit lågare nivå om kort tid. Gitt at den permitterte er venta å returnere til eigen arbeidsgjevar, meiner me framleis at der er gode tilhøve for inkludering, seier Lægreid vidare.

Han viser i februarrapporten til Nav til at talet stillingar NAV har registrert i februar, der det for månaden februar er registrert at ein region Sunnhordland samstundes har 468 utlyste stillingar.

Avvik mellom kompetanse og etterspurnad

Dette tilsvarer meir enn 23 ledige stillingar per verkedag i februar, og viser at ein har tilgang på 83 fleire ledige stillingar enn heilt ledige i perioden.

– Me ser framleis eit høgt tal stillingar. Arbeidsmarknaden held seg stram, og me oppmodar arbeidsgjevarane til å sjå på korleis ein kan inkludere fleire i arbeidslivet. Me stiller gjerne til ein samtale med verksemder som ser dei kan ha rom for dette, seier Håvard Lægreid.

Han gir også uttrykk for å vera noko uroa for at ikkje avgangen arbeidssøkarar er høgare, no som tilgangen på stillingar er stor.

– At der ikkje er fleire som vert avregistrert frå NAV i ei tid med så stort tal utlyste stillingar, uroar litt. Me meiner ein av drivarane er at det kan eksistere ulikskap mellom kva verksemdene lyser ut etter, og kva den som står ledig har av kompetanse. Me er spente på om Bedriftsundelsøkelsen vil belyse det same, og eventuelt kva anna innsikt den vil bringe, seier Lægreid vidare i månadsrapporten.