Ny kommuneoverlege

Frå 1. september overtar Glenn André Oppland som kommuneoverlege i Kvinnherad.

Glenn André Oppland var ferdig med medisinstudiet for to år sidan, og har sidan den tid vore gjennom turnusperiodar både på sjukeheim og sjukehus. Det siste halve året har han hatt distriktsturnus på Austevoll.

Kommuneoverlege i Kvinnherad er ein 50 prosentstilling, og han startar i jobben 1. september. Frå november av skal han fylla resten av arbeidstida med å vera lege ved Rosendalstunet.

– Eg skal driva førebyggande helsearbeid og folkeopplysing, føra tilsyn og samarbeida med mattilsynet. I tillegg har kommuneoverlegen uttaleplikt i fleire saker, mellom anna i samband med ulike nybygg, forklarer Oppland.

Han ventar seg ei bratt læringskurve etter som han skal hoppa inn i ei kommuneoverlegestilling som relativt fersk lege.

– Eg kan trivast godt med det førebyggjande aspektet ved stillinga. Det er noko eg interesserer meg for, seier Oppland.

 

Vaksine

Som kommuneoverlege med folkehelsebrillene på, ser han på framveksten av antibiotikaresistente bakteriar og lågare vaksineringsprosent som to store trugsmål mot helsa.

– Utviklinga av vaksine er kanskje det største medisinske gjennombrotet som er gjort. Mange tenkjer at ein tar vaksine for sin eigen del, men ein tar det like mykje for dei som ikkje kan få vaksine, til dømes dei som er for sjuke eller for svake til å få det. Viss mange nok er vaksinerte, får dei andre ein «flokkbeskyttelse» mot sjukdommen av at me som er vaksinerte hindrar smitta i å nå dei, forklarer han.

Meslingar, som var bortimot utrydda i Europa, er no på frammarsj igjen grunna dårleg vaksinetettleik i somme område.

– Det er eit døme på ein vanvettig smittsam, og potensielt dødeleg, sjukdom som no smittar fleire, heilt unødvendig, seier han engasjert.

 

Småbarnsfar

Han er gift med Anna Lunestad, som kjem frå Rosendal og som også er utdanna som lege. Ho har foreldrepermisjon frå turnustenesta no, og skal etterpå fullføra den. 31-åringen frå Eidsvoll flyttar til Rosendal med kone og tre barn.

– Me ser for oss å busetja oss i Rosendal, men førebels har me ikkje noko plass å bu. I byrjinga kjem me til å bu hos svigermor, seier Oppland til Grenda når me treff han i hagen til nettopp svigermor.

Den vordande kommuneoverlegen går sjølv med eit synleg prov på nærkontakt med helsevesenet drapert kring høgre handledd.

– Eg var på tur over Vidden i Bergen då eg snubla. Eg slo handa då eg tok meg føre. Legane mistenkjer at det er eit handrotsbrot, eller Skafoid fraktur, som er den medisinske termen for det. Eg skal på røntgen med handa igjen for å endeleg fastslå om det er brot. I så fall kan det kosta meg to månader til med gips. Eg fryktar det verste, sluttar Eidsvoll-karen.