Ny journalist i Grenda

Morten Nygård

Morten Nygård

morten@grenda.no

Publisert: 4. desember 2018, 08:18

Songfuglen og nynorskentusiasten Ingebjørg Eik er tilsett som ny journalist i Grenda. Ho hadde sin fyrste arbeidsdag i går.

33-åringen er født og oppvaksen i Rosendal. Mange vil nok kjenna ho som songar, og seinast laurdag kveld hadde ho ein utseld konsert på Rosendal Turisthotell. Karrieren hennar har bydd på fleire store høgdepunkt.
– Den andre skikkelege spelejobben min var på den største scena til Roskilde-festivalen. Den fyrste jobben var på VG-lista i Oslo i 2007, så du kan seia eg vart kasta ut i det. Det var nesten så eg tenkte at herifrå kunne det berre gå nedover, smiler ho.
Dei to nemnde oppdraga var som korist for gruppa Big Bang. Ho har også kora for Eva and the Heartmaker på Rådhusplassen, spelt på mange festivalar, hatt TV-opptredenar og underheldt i samband med ski-VM i Oslo. I tillegg har ho vore med på fleire vidgjetne arrangement i regi av Petter Stordalen og Jan Fredrik Karlsen.
– Då kora eg med fleire forskjellige artistar og song duett med Jarle Bernhoft. Det var nesten kjekkare enn å spela på Roskilde, seier Ingebjørg

 

Slottet
I Oslo har ho elles jobba i Norges forskingsråd og på Slottet. Hjå fyrstnemnde sysla ho mykje med å omsetja offentlege dokument frå bokmål til nynorsk, medan ho på Slottet førde rekneskap.
– Så du har full oversikt over korleis Kong Harald og Dronning Sonja brukar pengane sine?
– Eg veit ein god del om det, ja, seier ho hemmelegheitsfullt.
I 2012 flytta Ingebjørg til Bergen, der ho fram til no har vore «kontorpotet» hjå NAV Åsane. No er det altså Grenda som er hennar nye arbeidsgjevar.
– Eg er veldig glad for at eg har tvihalde på nynorsken i alle jobbane mine. Å få tilbod om arbeid i Grenda kunne eg ikkje seia nei til, fortel ho.
I heimbygda har ho innkvartert seg i foreldra sin seglbåt i Rosendal Hamn. Det gjer at ho får råd til å behalda leilegheita i Bergen.
– Det ville vore litt skummelt å flytta heim for fullt, No byrjar eg forsiktig, og så får vi sjå korleis det går, seier Ingebjørg Eik.