Denne bilen skal gjera kvardagen i brannstasjonen i Rosendal både meir effektiv og trygg. (Foto: Diana Ousdal)

Ny brannbil i Rosendal

Den nye brannbilen til Rosendal brannstasjon er no sett i teneste.

– Stasjonen i Rosendal har for fyrste gong fått det vi i brannvesenet kallar for ein mannskapsbil. Tidlegare har stasjonen hatt ei mindre god løysing med ei tankvogn og ein mindre redningsbil. Med denne type bil på plass får vi ein mykje betre beredskap enn tidlegare i form av at vi no har det meste av utstyret vi treng med oss i ein bil, seier avdelingsleiar førebyggande Øyvind Ousdal i Kvinnherad Brann og Redning.

Artikkelen held fram under annonsen.

Det betyr i praksis at stasjonen no berre treng å fylla bilen med mannskap når alarmen går. Og med det kan dei planlegga innsatsen i bilen på veg mot hendinga.

– Vi har fått ein mykje meir egna bil for å løysa dei oppgåvene som i dag er venta av oss. Bilen og utstyret gjer oss i stand til å hjelpa innbyggjarane i kommunen meir effektivt då bilen raskt og trygt kjem seg fram med nødvendig utstyr og mannskap, seier Ousdal.

Noko som ikkje berre er til glede for innbyggjarane i Rosendals-området.

– Det kjem alle innbyggjarane til gode då det går raskt å flytta ressursane frå eit område til eit anna ved større hendingar, seier Ousdal.

Bilen vert innreia tilnærma likt mannskapsbilen på Husnes. Noko som gjer at mannskap frå ein anna stasjon er godt kjent med bilen.