NRK viser konsertfilm frå Baroniet

Håvard Sætrevik

Håvard Sætrevik

haavard@grenda.no

Publisert: 8. oktober 2020, 10:00

Søndag viser NRK2 konsertfilm av Leif Ove Andsnes med vener, filma i Riddersalen til Baroniet Rosendal.

Då årets Rosendal Kammermusikkfestival vart avlyst, vart det som eit plaster på såret gjort ein konsertfilm i samarbeid med filmskapar Magnus Lysbakken.

– Kammermusikkfestivalen blei i år kansellert, men me bestemte oss for å bruka ein del ressursar på å laga ein kvalitetsfilm. Både for å få markert Beethoven-jubileet, men også for å få til ei urframføring av komponist og saksofonist Marius Neset sin «Who we are», som blei bestilt til Festivalen, skriv Leif Ove Andsnes i samband med filmen som blir vist søndag kveld.

Verket er ein kvartett for fløyte, cello, saksofon og piano.

Medverkande musikarar i filmen er Elise Båtnes (fiolin), Louisa Tuck (cello), Marius Neset (saksofon), Ingrid Søfteland Neset (fløyte), Christiane Karg (sopran) og Leif Ove Andsnes på piano.  Konsertfilmen blei spelt inn 8. til 11.august i år.

NRK omtalar det som ein konsertfilm frå Baroniet Rosendal med Leif Ove Andsnes og handplukka musikarvener. Programmet blir presentert av Arild Erikstad.

Anne Grete Honerød ved Baroniet Rosendal er svært nøgd med profileringa dette byr på.

– Magnus Lysbakken vore sesongarbeidar hos oss i mange år. Han er filmutdanna, og det er veldig kjekt at hans arbeid blir vist på NRK. At deler at festivalprogrammet som skulle visast likevel kjem ut til heile landet, er me veldig glade for. Det er absolutt nyttig marknadsføring av Baroniet og kammermusikkfestivalen, smiler Honerød.

Programmet for 2021-festivalen vil bli presentert utpå nyåret. Beethoven-festivalen blir framført i 2022.

Elise Båtnes (fiolin), Leif Ove Andsnes (piano), Christiane Karg (sopran) og Louisa Tuck (cello) er blant musikarane som deltar i konsertfilmen som NRK viser søndag kveld. (Foto: Helge Hansen)