Husnes Musikklag 70 år

Den 28. februar 1952 vart Husnes Musikklag danna, og i år feirar dei 70 år.

I anledning jubileet har dei hatt fleire kjekke kveldar i løpet av året, og laurdag 8. oktober skipa dei til oktoberfest.

«Dette er ikkje ein konsert, det er berre lått og løye», sa konferansier Sveinung Grønstøl før musikklaget spelte opp med «Bier her, bier her, oder ich fall um».

Dei som møtte opp fekk sjå heile musikklaget i lederhosen og tyrolarhattar, oppleva drikkeviser og musikk å dansa til, smaka bratwurst og sjå sketsjar frå revygjengen i Høylandsbygd.

Husnes Musikklag gjer seg ikkje med det, og den 20.november ventar ein ny konsertkveld med variert musikk.