Forpaktarane, hestane og eit gravfølgje
Dette biletet av fjordhestane på Avlsgarden får Samson Feedt til å mimra om det siste gravfølgjet som vart køyrt med hest frå Omvikdalen til Rosendal.
Publisert
Dagens gamle bilete er teke i 1923, og viser forpaktarane på Rosendal Avlsgard, Brita og Sigfus Mehl, saman med dei fem staute gardshestane. Brita og Sigfus var forpaktarar i 20 år, frå 1917 til 1937. Også fire av borna er med på biletet. F.v. ser vi Knut, som vart jurist i Oslo. Så har vi dottera Martha, som vi straks kjem attende til. Neste er Sigfus jr, kjent distriktsveterinær i Fusa og seinare Kvinnherad. Deretter har vi Lars, som vart fylkesagronom i Hordaland. Han skreiv òg boka «Kvinnheradshesten. Frå Rosendalsborken til Haugjo». Familien fekk seinare éin gut til, Ivar. Som vaksen vart han styrar av ein forsøksgard på Voss.
Torpedert
Annonse
Men attende til Martha. Ho var fyrst gift med sjømannen Per Korsvold frå Omvikdalen. Han mista livet under krigen, då skipet han jobba på vart torpedert utanfor Afrika i 1941. Martha gifta seg oppatt med bakar Sigurd S. Feedt i Omvikdalen. Han var onkelen til Samson Feedt.
Mor til Martha budde hjå dottera fram til ho døydde i 1955. Samson var då 16 år.
«På gravferdsdagen vart det lagt eit åkle på høyvogna og kista sett på åklet. Ivar og Knut var på skogen og hogde brakje, som dei hakka og strødde i tunet og rundt kista. Så køyrde eg kista, medan gravfølgjet fylgde etter dei sju kilometrane frå heimen på Feedt til Kvinnherad kyrkje i Rosendal. Dette var siste gravfølgjet som vart køyrt med hest frå Omvikdalen», skreiv Samson i bladet Fjordhesten, og no deler han denne spesielle historia med Grenda sine lesarar.
