Fleire fekk varsel om prikkar

Halsnøy Kulturhus Kippers og Halsnøy Kulturhus Pub nr. 13 får to prikkar kvar for mangelfull internkontroll. Kippers sin internkontroll mangla mellom anna alkohollova og forskrifter, opplæringsdokument og avviksskjema, medan Pub nr.13 mangla lovar og forskrifter, opplæringsdokument og kunnskapsprøvene til styrer og stedfortreder.

Ein internkontroll er viktig for drifta av utestaden, og her samlar ein alkohollova, forskrifter og anna dokumentasjon som dei tilsette må ha lett tilgang til.

Alkoholforskrifta §8-2 seier at internkontrollen skal sikra at verksemda sine aktivitetar planleggast, organiserast og vert utført i samsvar med krav fastsett i bevillinga.

Skjenketid

Bar-On i Rosendal får fire prikkar for å ha skjenka alkohol etter skjenketid. Alkoholpolitisk handlingsplan for Kvinnherad kommune viser tydeleg at vedtatt skjenketid er fram til 01.30 for all alkoholhaldig drikk.

«Skjenkjekontrollen 22.10 avdekka fleire høve av skjenking etter lovleg skjenketid», kjem det fram i førehandsvarselet frå kommunen.

Dei to utestadene har til 09.11 å koma med uttale før kommunen vedtek tildelinga.

Kjem summen av prikkar opp i 12 over ein periode på to år, vert skjenkeløyve inndratt i ei veke.