Alle vil ha fortau på Husa bru

Etter artikkel vart publisert har Ølve bygdelag sendt brev til planavdelinga i kommunen. Dei stillar seg undrande over at det ikkje er planlagt for og sett av pengar til fortau over brua.

«I kommuneplanen er Ølve definert som nærsentrum. Elva med Husa bru deler dette sentrumsområdet vårt, Dalssjøen, i to. På sørsida ligg mange etablerte bustader, det nye byggjefeltet, Jokerbutikken, dampskipskai med flytebrygge, den mest brukte badeplassen, idrettsplassen, ungdomshuset, skyttarhuset, Galleri Banken og posthuset, som er blitt vårt lokale geoparksenter», skriv Lilli Britt Urheim og Eva Røyrane i brevet til plansjef Rune Helland.

Folk flest bur på den andre sida av elva, og skulen, barnehage og Ølve alderspensjonat ligg også her. Litt lenger bort på same side ligg dei to store arbeidsplassane Herde og Ølve industriar.

«Sidan så mange, folk i alle aldrar, bur så nær brua. Er det stor trafikk av mjuke trafikantar over Husa bru. Her er fotgjengarar på veg til og frå skule og barnehage, folk som går på butikken for å handla og spreke bebuarar på alderspensjonatet som aukar livskvaliteten ved å gå eller trilla rullestol til butikken eller til utstillingar og konsertar i Galleri Banken. Folk går og syklar på arbeid og mange går på tur», heiter det vidare i brevet til kommunen.

Det er tydeleg at det er mange fotgjengarar som treng bru for å kome seg til og frå aktivitetar, butikk, skule og anna. Samstundes er det stor trafikk gjennom Ølve, både nyttetrafikk med store bilar og mindre personbilar.

«På ei større og betre bru kan bilane halda større fart, trafikkfaren for dei mjuke trafikantane vil auka. Etter kvart som det kjem fleire hus i det nye byggjefeltet sørom brua, vil talet på born og unge som brukar brua auka. Behovet for eit fortau vil pressa seg fram til ein mykje høgare kostnad enn dagens kalkyle. Det vil altså løna seg å laga fortauet no i samband med det pågåande bruarbeidet», skriv Urheim og Røyrane og ber om at kommunen medverkar til å få bygd fortau.

MÅ byggja fortau

På planavdelinga i kommunen vart det reagert på artikkelen Grenda publiserte 17.august. Plansjef Rune Helland fortel at han ikkje er einig i det Ove Mansåker fortalde.

– Vi stussa litt på dette med at det ikkje er planlagt fortau på grunn av manglande finansiering. I dispensasjonen som vart gjeven står det klart at fortau skal byggast, fortel Helland til Grenda.

I eit saksframlegg til forvaltningsutvalet den 02. november 2022 innstiller kommunedirektøren på at det skal bli gitt «dispensasjon frå planbyggelova §1-8 om forbod mot tiltak langs sjø og vassdrag, til bygging av bru samt til etablering av mellombels bruløysing».

Vidare står det at «dispensasjonen vart gjeven under vilkår av at det innan 1 år vert varsla oppstart av reguleringsendring/reguleringsplan for området, og at det vert sikra ei tilfredsstillande løysing for mjuke trafikantar over den nye brua og i samband med bruk av den mellombelse bruløysinga».

Må koma til ei løysing ilag

Det er Vestland fylkeskommune som har ansvaret for arbeidet, og i søknaden til forvaltningsutvalet skriv dei at dei søkjar om riving av Husa bru og bygging av ny bru grunna usikkerheit knytt til brua si bereevne. Samstundes skal vegen i begge endar justerast i samsvar med ny kurvatur over bru.

-Det er plass til ein form for fortau eller overgang, men den brua som vart godkjend inneheld ikkje dette, forklarar Ove Mansåker.

Mansåker vil understreka at han meiner det er viktig med fortau, og at dei som bur i Ølve skal ha ein trygg veg å ferdast på.

– Det er viktig at dei som skal bruka brua blir nøgde. Vi meiner at det hadde vore gunstig å laga fortau no når vi allereie har maskineriet på plass, seier han, og legg til;

– Eg må forholda meg til den informasjonen eg har, og sånn eg forstår det er det ikkje innvilga pengar. Dette håpar vi at endrar seg, gjerne ved at vi set oss ned og finn ei løysing på det.