SIM skal no kontrollera biodunken din for avfall. Kastar du feil vankar det gule og raude kort. (Pressefoto)

No kan biodunken din få gult eller raudt kort

Denne veka startar SIM ein stor aksjon der dei vil kontrollera avfallet i biodunken din.

Dette gjer dei ikkje for å straffa folk som sorterer feil, men for å gje folk ei påminning om korleis det skal gjerast.

Artikkelen held fram under annonsen.

– Dei aller, aller fleste er veldig flinke og sorterer rett, men me registrerer dessverre ein del som ikkje gjer det, seier plan- og kommunikasjonsansvarleg Janne Hillersøy i SIM i ei pressemelding.

Ho fortel at det er særleg plast og glas som går igjen som den store syndaren i bioavfallet. Syndarar som igjen skapar problem i komposteringsprosessen og som fører til at sluttproduktet vert forringa.

– Me opplever kundar som har kjøpt kompostjord eller plenblanding hos oss, kjem med tilbakemelding om at dei ser restar av plast i jorda. Me klarer å sortera ut mesteparten av det feilsorterte avfallet, men plast og glas er vanskelege fraksjonar å sortera ut alt av, og av den grunn skal ein ikkje bruka handleposar i biodunken, seier Hillersøy i pressemeldinga.

Skulle du ha sortert feil, vil det bli merka i form av gule og raude kort.

– I fyrste omgang vil kunden få ein gul lapp på funken. Denne gjev kunden ei melding om at avfallet er feilsortert, men at dunken er tømt likevel. Dersom dette skjer igjen får kunden raud lapp, noko som betyr at avfallet igjen er feilsortert, men denne gong tømmer me ikkje dunken. Ved grov feilsortering vil ein få raud lapp med det same, står det å lesa i pressemeldinga frå SIM.