No er Johnny poengkongen i Obos-ligaen

Marius Tveit Nissestad

Marius Tveit Nissestad

marius@grenda.no

4 september, 2018

Johnny Furdal var involvert i alle måla då Viking slo Levanger 3-0 søndag kveld. Med det er han mannen med flest målpoeng i Obos-ligaen.

Førre veke starta med ei dobbeltside med Johnny i VG Sporten, før hovudpersonen sjølv avslutta veka med eit mål og to målgjevande då Viking klatra opp på 2. plass i Obos-ligaen. Noko som var nok til at både Stavanger Aftenblad og Rogalands Avis kåra omvikdelingen til dagens Viking-mann.

«Nok ein gong var Johnny Furdal i ein klasse for seg sjølv på Vikings midtbane. Den tidlegare Nest-Sotra-mannen strødde om seg med krempasningar til høgre og venstre, og leverte ein kamp av ypparste kvalitet» står det å lesa i Rogalands Avis, som gav Johnny karakteren 8.

– I fyrste omgang synest eg det faktisk var ganske tungt, og då fekk vi ikkje heilt spelet vårt til å fungera. Men frå då eg scora det andre målet vårt, så hadde vi full kontroll. Då køyre vi over dei, og vi burde ha scora fleire mål. Men vi heldt nullen, scora tre mål og tok tre poeng, og det er det som tel, seier Furdal til RA.

Etter søndagens herjingar på Stavanger Stadion er Johnny den spelaren i Obos-ligaen med flest målpoeng denne sesongen. Og med ni mål og elleve assist på sine 22 kampar, leverer han i snitt eit målpoeng kvart 99 minutt.