Tronds Marine Service snudde skuta - 2024 vart eit rekordår

Grenda har teke ringerunden rundt til ulike bedrifter og fått ein tilstandsrapport ved slutten av eitt budsjettår og starten på eit nytt. Det er mange som har gode ting å melda, mellom anna Tronds Marine Service.

– Det er veldig kjekt. I 2024 hadde me rekord på omsetnad og resultat, kan dagleg leiar Kjartan Mehammer fortelja.

Året baud på mange oppdrag for reiarlaget, mellom anna kunne dei bidra med fartøy og utstyr til havvindprosjektet Hywind Scotland i Sløvåg i Gulen og sjøtestinga av produksjonsskipet «Johan Castberg». Selskapet har også fleire lekterar som har god aktivitet, mellom anna ein lekter på lang kontrakt i Genova i Italia, og fleire lekterar på Boliden sitt prosjekt i Odda.

– Me kom frå 2023 med nokre utfordringar som me har klart å løysa. Då hadde me verdi-nedskriving av eit fartøy, som gjorde at me mista 40 millionar frå botnlinja. Men det kunne heldigvis forklarast som ei enkeltståande hending, så i 2024 har me klart å snu det til eit veldig godt år, seier Mehammer.

Selja jordbæra

Mehammer håpar på eit framleis godt år i 2025, men i hans bransje er det ikkje godt å vita på lang sikt kva som vil skje.

– For det første skal me selja dei jordbæra me har, ler han, før han forklarar:

– Vår utfordring er at me held til i den såkalla spotmarknaden, som gjev eit svært kortsiktig bilete av den framtidige drifta. Me har vissheit berre omtrent 2-6 veker fram i tid. Det kan vera ein fordel når det er mykje fart i marknaden, men ei utfordring når det er mindre som skjer.

Sju lærlingar

Folka ved Tronds Marine Service er også opptekne av å vidareutvikla industriområdet i Høylandsbygd, og har lagt til rette for å utvida arealet.

– Me jobbar med kundar som har behov for lagring av offshore-utstyr. Men det treng ikkje berre vera oss i Tronds Marine Service som kan bruka arealet, det kan vera fleire som treng plass til å driva næring, så det er berre å ta kontakt, understrekar Kjartan Mehammer.

Den daglege leiaren er uansett særs nøgd med arbeidsåret 2024.

– Det har vore ein kjempegod innsats frå heile gjengen her. No har me òg sju lærlingar her for tida, og det er veldig kjekt. Det er jo dei som er framtida, slår han fast.