Tar julefeiringa nær Bjørnøya
20 år gamle Thomas Kloster frå Halsnøy skal feira si fyrste jul utan familien. I år skal julemiddagen nytast på fiskebåten Nordstar, i farvatnet kring Bjørnøya.
Thomas byrja i jobb på fiskebåten, som er ein botntrålar, i oktober i fjor. Då hadde han fyrst vore lærling på ein annan båt. Han har fagbrev i matrosfag frå Austevoll vidaregåande skule, eit fagbrev som også er nyttig innan fiskaryrket.
Thomas jobbar i turnus med fem veker på og fem veker av. Dette året fall jobbturnusen hans saman med julefeiringa, og han reiste på jobb 27. november. Heimreisa blir ikkje før 10. januar 2023.
Annonse
– Korleis trur du det blir å feira jul heimanfrå for fyrste gong?
– Eg er ei sjel og ei skjorte, har verken barn eller eigen familie, så det trur eg skal gå heilt fint. Ein må rekna med å måtta ofra ei jul av og til, seier den sindige karen.
– Det er nok verst for mammo og besto, dei synest ikkje noko om det, legg han til.
Julemiddag har han allereie ete:
Annonse
– Mamma laga til pinnekjøt i slutten av november for meg, så det var snilt av ho. Og julepresangar blir det når eg kjem heim!
Elles fortel Thomas at det blir julemiddag til sjøs òg. Kokken ombord diskar opp med pinnekjøt.
– Kjem du til å vera på "facetime" eller noko sånt med familien på julafta då?
– Det spørst, det er veldig dårleg internett ute på sjøen, me skal jo vera oppe med Bjørnøya og fiska etter Raudfisk, eller Uer som me kallar han her heime. Det er nok helst dei som har ungar som kjem til å bruka nettet den dagen.
Julestemning av å veda
Me lurer på kva det er som vanlegvis får den unge mannen i julestemning, og det grunnar han ikkje lenge på:
Annonse
– Eg pleier å veda litt før jul, og det å kjenna diesellukta frå traktoren får meg alltid i julestemning! Det kjem eg til å sakna!
Thomas likar å styra på ute i skogen, som han seier, og brukar elles også mykje tid på å mekka på bil. I tillegg fiskar han og jobbar som avløysar på gard når det er bruk for han.
– Eg likar best å vera opptatt med noko, ja, seier han, og legg ikkje skjul på at han ikkje har problem med å fylla dagane når han har heimeperiodane sine.
– Og så likar eg å gå på besøk til familien. Eg har både besto, onklar og tanter i nærleiken som eg ofte stikk innom.
– Kva kjem du til å sakna mest denne jula, trur du?
– Det må nok vera å komma inn i stova etter at eg har veda, og sjå at heile slekta er samla, og kjenna lukta av pinnakjøtet. Eg kjem nok til å sakna familien mest.
Annonse
– Korleis blir det på båten, gjer de noko ekstra til jul?
– Det vert nå pynta til jul og så er det jo julemiddag då. Eg har kjøpt julegåve til to av dei som eg kjenner best der ute, og så får eg nok nokre smågåver med meg frå mamma, sluttar unge herr Kloster, som ikkje syt seg med å måtta feira jula til sjøs i år!
Me ynskjer han ei retteleg god jul på sjøen!
