Spente og forventingsfulle nye butikkeigarar

Det var to spente og glade nye eigarar me møtte i butikken laurdag 10. desember. Janka Korsvold og Stine Kolaas har jobba saman på Rosendal Fjordhotell i mange år, og kjenner kvarandre godt. Og sjølv om butikkfaget er nytt for dei, er ikkje engasjementet i servicenæringa det.

– Det er litt skummelt å starta med noko heilt nytt, men me får god rettleiing av tidlegare eigar, Anne Marit, seier Janka.

Også Anne Marit var til stades i butikken, noko ho har sagt ho skal vera så lenge det trengst. Det set dei to nye eigarane stor pris på, for det er mykje å læra, synest dei.

– Ho har svart belte i dette faget, legg Janka til.

Og slik kan det med rette seiast når ein har drive klesbutikk i 45 år, slik Anne Marit Kolaas har.

Veletablert butikk

Senter Woman er ein veletablert butikk med mange trufaste kundar, både frå Kvinnherad og andre stader.

– Det kjem kundar både frå Ølen og Etne. Folk kjem igjen og igjen, seier Anne Marit.

Ho peikar på at ein av grunnane til at folk likar butikken, er at han ikkje er kjedebunden. Her kan ein finna klede som ein ikkje finn i mange av dei andre klesbutikkane. Dermed vert vareutvalet også unikt.

– Me trur lokalsamfunnet vårt treng ein slik butikk. Mange kundar har komme og sagt at dei er glade for at me fortset med drifta, seier Stine.

– Kjem de til å fortsetja med det same vareutvalet som butikken er kjend for?

– Me vil behalda Anne Marit sitt konsept, men det blir kanskje små endringar, svarar Stine.

Her peikar Anne Marit på at duoen allereie har tankar om eit nytt tilbod:

– Ja, me kjem til å tilby sy-tenester, og vil ha ein liten krok med symaskin, der kundar kan få lagt opp bukser, til dømes, seier Janka.

Det er Janka som skal stå for syinga. Dette meiner Anne Marit vil verta eit ettertrakta tilbod. Og med tanke på dei buksene me sjølv har liggjande i skapet fordi dei vart for lange, trur me absolutt ho har rett i det.