Spanande program for Rosendalsveko

I august vert Rosendalsveko arrangert for femte gong, og det er Universitetet i Bergen, Folgefonnsenteret og Havforskningsinstituttet som igjen inviterer til eit to dagars arrangement på kaia i Rosendal.

– Med Rosendalsveko ynskjer vi å samla kunnskapsinstitusjonar, næringsliv, samfunnsliv, styresmakter og politikarar til idémyldring og gode diskusjonar rundt klima, naturmangfald, energi, næringsutvikling og berekraft, skriv Folgefonnsenteret på sine sider.

I fjor var det klima og natur som stod på programmet, medan i år er tema klima, risiko og beredskap. Det vert diskutert fleire tematikkar som klima og natur i ei turbulent verd, ekstremvêr, status på fjordane våre, samt oppdatering på Vestlandet som ein robust og berekraftig føregangsregion, også med tanke på turisme i tida som kjem.

Spanande deltaking

Universitetet i Bergen (UIB) skriv på sine sider at det blir spanande deltaking med blant anna direktør ved Nansensenteret Tore Furevik, Mari Myksvoll ved Havforskningsinstituttet, Fylkesvaraordførar Vestland Stian Jean Opedal Davis, Aslak Sverdrup ved Innovasjon Norge, Sondre Eide ved Eide Fjordbruk og fagdirektør ved Havforskningsinstituttet Peter Haugan, for å nemne nokon.

– Regionens politikare er og med, mellom anna Linda Merkesdal (AP), Terje Halleland (Frp), Une Bastholm (MDG), Hans Inge Myrvold (Sp) og Marthe Hammer (SV), og blant ordførarane frå Hardanger deltek Vegard Bjørnevik (Kvinnherad), Timo Knock (Eidfjord) og Mette Heidi Ekrem (Etne), skriv UIB vidare.

Eit fullspekka program

Ut i frå programmet kan ein sjå at desse dagane blir fulle av interessante føredrag og diskusjonar, med eit breitt utval av spanande og kunnskapsrike menneske. Dagane byr på mellom anna panelsamtale blant ungdom, politikare, ordførarar, samt ekskursjonar og geologisk vandring.

Arrangørane ynskjer alle velkomen til å ta med ein kollega eller to til Rosendal 5. og 6. august, der ein kan delta i gode samtalar på tvers av sektorar og få påfyll av kunnskap rundt klima, risiko og beredskap.