Selde bra med bøker

Bente Soldal ved Rosendal Bokhandel fortel at 2022 har vore eit godt år, og at det er mange gode bøker som er kome ut. Ho selde mest lokal litteratur, og nemner bøkene til Kaare Skaala, Arne Torget og Anders Totland.

– Desse tronar nok likt på toppen, seier ho.

Av generell litteratur, det vil seia skjønnlitteratur, trekkjer ho fram to romanar som har selt bra. Den eine er ein krimroman av Anders De la Motte som heiter «De bergtatte». Denne romanen er den fyrste i ein komande krimserie.

– Den likte eg veldig godt sjølv, og har anbefalt han til mange, seier ho.

Elles fortel Soldal at den historiske romanen «Kniven i ilden» av Ingeborg Arvola også har gjort det svært bra. Denne romanen har fått gode omtalar, VG slo til med terningkast seks, medan fleire andre aviser gav terningkast fem.

Heidi Sande Gertz ved Norli Husnes kan også rapportera om eit godt sals-år i fjor. Dei selde mykje bøker, og som i Rosendal, aller mest lokale. På topp her ligg Anders Totland, med Arne Torget på andre plass.

På tredje plass ligg ein roman som tronar øvst hos Norli på landsbasis: «Å vanne blomster om kvelden» av Valérie Perrin. Denne boka har fått fleire seksarar av dei som har trilla terningen. Hos Norli Husnes må denne romanen dela tredjeplassen med Halvor Folgerø si fyrste utgåve av «Vestlandsvegar».

– Og så kan eg nemna at femteplassen er teken av ei kokebok, seier Sande Gertz.

Dette er boka «Den store airfryer-kokeboka» av Trude Eide Straume.