Prosjekt Konsult Kvinnherad AS fusjonerer med NovaForm AS
Fusjonen vil tre i kraft frå nyttår, står det å lesa i ei pressemelding frå Prosjekt Konsult Kvinnherad AS. Dei tidlegare eigarane her vil då verta tilsette i NovaForm AS si avdeling i Kvinnherad, med kontor i Kest-bygget på Husnes.
Firmaet Prosjekt Konsult Kvinnherad AS vart stifta 23.01.2001 av Knut Magnar Teigen og Eivind Sjursen. Firmaet har variert i storleik i løpet av åra, men per i dag består firmaet av dei to eigarane.
– Me byrjar begge å dra på åra, og difor valde me å fusjonera med eit anna firma, seier Teigen på telefon med Grenda.
Annonse
Han fortel at dei har jobba med fusjoneringsspørsmålet det siste året, og at NovaForm var interessert i å overta firmaet.
– Me synest det er veldig kjekt at nokon vil vidareføra det som me har bygt opp, seier Teigen vidare.
NovaForm driv innan bygg og anlegg, og har stort sett liknande profil som Prosjekt Konsult Kvinnherad AS hadde, fortel Teigen. Han legg til at dei to tidlegare eigarane ser fram til å starta opp i nytt firma.
Han vil takka kundar og samarbeidspartnarar for samarbeidet opp gjennom åra, og håpar på vidare samarbeid i det nye firmaet. Han avsluttar pressemeldinga med å seia at dei skal gjera sitt beste for å gje den same servicen som før i det nye firmaet.
