Opningsfest for nyoppussa vertshus

No er det igjen blitt liv i Vertshuset i Uskedalen. Og med dei aldri kvilande Elin og Geir Enes som eigarar og drivarar, er det all grunn til å tru at det nye konseptet viser seg levedyktig. Dei har i alle fall jobba hardt for å gje bygninga ei heilt ny drakt.

– Vi har flytta baren ut i eit naborom, slik at restaurantlokalet har blitt mykje større. Og så jobbar vi med å oppgradera kjøkenet, men det er ikkje heilt ferdig enno. Vi har også kjøpt nye møblar, for dette var jo eit konkursbu, så det var ingenting att. Både kjøkenet og restauranten var heilt ribba. I tillegg har vi rive eit gamalt fryserom som har stått her heilt sidan slakteri-tida. Så no har vi fått eit heilt anna rom, fortel Geir Enes, og legg til at alt utvendig og innvendig er nymåla.

Elles kan gjestene gle seg over at det er etablert ei lounge-avdeling langs vindauga, der dei kan slappa av etter maten. Også lydtilhøva skal no vera betre i lokalet.

– Det var ganske dårlege lydtilhøve her, men vi har prøvd å dempa lyden litt ved å henga opp gardiner langs veggen, seier Geir Enes.

Temakveldar

Vertshuset Perla opna dørene laurdag kveld. Då Grenda stakk innom tre timar tidlegare, var 44 av dei 48 plassane bestilte. Utan koronarestriksjonar vert kapasiteten ein stad mellom 120 og 150. Gjestene kunne sjå fram til ein 12-rettars tapas-meny, pluss at ein vinleverandør var til stades for å servera vin tilpassa maten og fortelja om dei ulike vinsortane.

– Vi startar med eit pang i dag, men vi har jobba mykje for å få dette på plass, smilte Elin Enes.

Duoen tenkjer å ha fleire temakveldar framover, men det er alltid maten som skal vera i fokus. Neste gong vert mogleg på 17. mai.

– Det er jo ikkje så mykje som skjer på 17. mai i år, så det kan vera kjekt for folk å ha noko å gjera då. Planane vidare kjem eigentleg an på kva folk ynskjer. Det er berre å koma med forslag, sa Elin.

– Ho har mange idear. Men det er jo avhengig av kva tid restriksjonane lettar, understreka husbonden.

Klona

Sidan kjøkenet ikkje vart ferdig tidsnok til opningsarrangementet, vart førebuingane noko tungvinte. Maten måtte nemleg lagast til heime og køyrast bort.

– Det har blitt mange turar fram og tilbake. Men vi har god kontroll. Den faste kokken vår, Ida (Gjengedal), har dessutan jobba på Hurtigruten, så ho er vane med større selskap, slo Elin Enes fast.

Noko av grunnen til at kjøkenet ikkje stod klart, heng saman med koronaen. Pandemien har som kjent skapt store problem for mange næringar, ikkje minst restaurantbransjen.

– Vi trengte litt pengar, så eg måtte senda Geir i arbeid att. Eg skulle ha klona han, så kunne han eine vore på Stord og jobba og han andre kunne vore her, humra Elin.

I tillegg til Vertshuset Perla, driv dei Restaurant Fiolen og Café Hylleblomen i Rosendal. Fiolen har no ope sju dagar i veka, medan Hylleblomen satsar mest på topperiodane og skuleferien.