Har godt samarbeid med byggebransjen
Sektorleiar for Samfunnsutvikling Anbjørn Høivik ber dei som vil setja i gang ein reguleringsplan om å ta kontakt med kommunen i staden for å venta på arealdelen av kommuneplanen.
– Me vil jo ikkje at folk skal sitja og venta. Ta kontakt med oss, så tek me ein prat om kva me kan få til. Det er jo slettes ikkje sikkert at området det er snakk om er eit av dei problematiske områda i arealdelen.
Høivik meiner det viktig med dialog for å finna gode løysingar.
Annonse
– Eg opplever at me har eit godt samarbeid med byggebransjen. Både dei og me er interesserte i å finna løysingar, og det får me til saman. Kommunestyret har jo også sett av ein god del pengar til bustadpolitikk, så her gjeld det å slå kreftene saman og handla.
Revidert plan
Arealdelen til kommuneplanen har teke lang tid å få på plass, av ulike årsaker. Men no håpar sektorleiaren at ein revidert forslag kjem ut på høyring mot slutten av vinteren.
– Det første planforslaget vårt vart møtt med motsegner frå stat og fylke. Då kan ikkje politikarane vedta det forslaget, for det vil uansett hamna høgare opp i systemet, og det vil me unngå. No driv me og finpussar eit revidert forslag som me skal få ut på høyring, før det skal handsamast politisk, forklarar Høivik.
Annonse
Bodskapen hans er likevel klar.
– Det er berre å ta kontakt, så kan me bidra til å få på plass ein reguleringsplan som vil fungera med arealdelen av kommuneplanen.
