Gunnar Irgens hadde opphøyrssal for klesbutikken sin i Borggata på Leirvik på seinsommaren og hausten 2022. Planen var å avslutta butikken, både grunna plassmangel og helsa. Men så ordna begge delar seg, og Gunnar bestemte seg for å driva vidare.

Gunnar Irgens gir seg ikkje: - Butikken er livet mitt!

På tur oppover Borggata på Leirvik, vil ein leggja merke til at lokala der butikken til Gunnar Irgens låg, nå står tomme. Men butikken til Gunnar lever i beste velgåande, to hus lengre oppe.

Journalist
Publisert

Grenda treff ein glad og opplagt Gunnar, som nøgd viser fram det nye lokalet. Han er oppteken av at folk skal få med seg at butikken ikkje er lagt ned, sjølv om det har vore annonsert opphøyrssal.

--Det er litt vanskeleg å nå ut til folk med at ein fortset å driva butikk etter at ein har hatt opphøyrssal! Men eg SKAL ikkje slutta, understrekar han.

Gunnar fortel at dei måtte ut av dei gamle lokala innan august 2022, grunna renovering. Dei kunne flytta tilbake etter fire månadar, men då til ei mykje høgare husleige.

– Det vart for dyrt. Og kvar skulle eg oppbevara alle kleda i mellomtida? Mote er ferskvare, seier Gunnar.

Gunnar er svært nøgd med det nye butikklokalet sitt, og synest det er greit å ha alt på ei flate. - Ei dame sa til meg: «Gunnar, dette er akkurat som ein liten, elegant, gresk butikk», seier han, og smiler godt ved tanken.

På denne tida sleit han alvorleg med helsa, og hadde fått beskjed av legen om at det beste for han var å trappa ned, også alderen tatt i betraktning.

Dermed vart det opphøyrssal, i eit mellombels lokale like ved. Salet vart ifølgje Gunnar godt besøkt, men det var likevel mykje klede igjen. Dei fekk då leiga lokalet der butikken er i dag, og flytta inn dit 28. august. Det nye lokalet er betydeleg mindre enn gamlebutikken, som gjekk over to plan.

– Me gjekk frå 400 kvadratmeter til 100, seier Gunnar.

Planen var å slutta av i oktober, og vona var å få ut enno litt meir klede innan den tid.

– Det er eit under!

17. oktober 2022 er ein merkedag for Gunnar. Då fekk han den gledelege beskjeden frå sjukehuset om at alt var i orden med han, og at han var heilt frisk! Då hadde han vore sjuk og svært svekka i eitt år.

– Dei oppdaga, på Haugesund sjukehus, at det ikkje var slik dei hadde trudd og forventa; dei store magesåra var vekke, alt var fint! Ja, det var eit under! Eg trur nok det er ein som har styrt med meg, seier Gunnar og nikkar lett mot himmelen.

Med desse gode nyhenda vart planane endra. Gunnar snakka med fastlegen sin, som meinte han ikkje måtte setja seg til heime nå. Avgjerda om å fortsetja med butikken var dermed ikkje vanskeleg å ta!

Gav gratis klede til ukrainarar

Gunnar hadde som sagt klede att i det mellombelse lokalet, som det ikkje var plass til i den nye butikken. I november såg Gunnar på fjernsynet at ein kunne senda pakkar med klede til Ukraina gratis. Dermed inviterte han ukrainarar til å komma og få klede til ein verdi av 5000 kroner og senda til heimlandet.

Mange troppa opp, både frå Kvinnherad og Stord. Kleda som var att etter dette, inviterte han menneske som er rusavhengige til å komma og forsyna seg av.

– Dei var så takksame for dette! Og eg fekk ut alt det gamle, så alt i butikken er nytt nå, seier Gunnar nøgd.

Gler seg over kvar dag

Gunnar framstår full av overskot, optimisme og glede. Han gler seg til våren, då skal han både til syden og fire dagar på motemesse i Oslo, for å velja ut nye klede. Og når det yrer av liv utanfor Frugård, restauranten vis-a-vis butikken, då vil han laga i stand mannekeng-oppvising.

– Eg er så glad for at eg er frisk! Eg ser lyst på livet, og har lyst til å vera i arbeid i fleire år! Ja, eg tenkjer å slå mor mi: Ho stod på lønningslista mi til ho var 94 år!

Gunnar viser fram det antikvariske kassa-apparatet han har til pynt på disken. Det er frå omkring 1850/60. Det kjøpte han av Robert Olsen i 1960, då Olsen hadde kolonialbutikk på Halsnøy. Sistnemnde hadde arva det av bestefar sin i Nord-Norge. Gunnar er bydd 50.000 for dette kassa-apparatet, og fortel at slike vert selt for langt meir enn dette. Det meste ein kan slå inn er 99.90, så apparatet er kun for augnefryd!

Sjølv er Gunnar snart 85 år. Det blir han i mai dette året. Men å pensjonera seg har han altså ikkje tenkt!

– Blir du ikkje lei og sliten av å pendla mellom Halsnøy og Stord seks dagar i veka, i allslags ver?

– Å nei, reisa gjer meg ingenting, eg slappar så av på båten, svarar Gunnar.

Han fortel at han har som rutine å gå inn til Landsbybakaren på Sæbøvik og eta frukost med varme rundstykke og kaffi kvar morgon, før han tek snøggbåten til Leirvik i ti-tida.

– Eg har det fantastisk godt! Eg gler meg til jobb kvar dag, og er så glad i butikken, dei tilsette og alle kundane mine.

I eine hjørnet av butikken har Gunnar laga til ein sofakrok. Her sit han saman med ei av dei tilsette, Inger Marie Monsen, som har jobba for han i eit par år. Ei av dei andre tilsette, Inger Larsen, har jobba for han i over 30 år, men var ikkje til stades denne dagen.

Sundagen derimot, då går han i kyrkja.

– Ja, eg må i kyrkja kvar sundag. Er det ikkje gudsteneste i Eid kyrkje, fer eg til Valen eller Husnes. Akkurat den timen er veldig viktig for meg. I kyrkja finn eg ro. Eg vil anbefala alle å gå i kyrkja, for der finn ein slik ro, sluttar Gunnar.

Og med dette avsluttar me praten med den erfarne butikkmannen, som har drive dame- og herrekonfeksjon i 62 år.

Gunnar trivst godt i den nye butikken sin, og sit gjerne utanfor og tek ein prat med dei som kjem forbi. - Butikken er livet mitt, seier han, og syt seg korkje med reisa over fjorden, eller med dei seks arbeidsdagane i veka.
sjukdom arbeidsmarknad medisin og helse arbeidsliv næringsliv halsnøy
Powered by Labrador CMS