Forsiktig optimisme i byggenæringa

Ei medlemsundersøking NHO gjorde i november, viste at byggenæringa var den mest pessimistiske av alle næringane i landet. 43 prosent av medlemmane i NHO Byggenæringen ser på situasjonen som dårleg, og 37 prosent trur til og med det skal bli endå vanskelegare framover. Det er langt fleire enn i andre næringar.

– Eg trur 25 prosent av alle konkursar i landet var innanfor byggenæringa, fortel Torgeir Rusten i Sandvoll Handel, då Grenda tek ein ringerunde til bedrifter i Kvinnherad.

Færre nybygg

Med dyrtid og høge renter har kundane i Noreg stort sett vegra seg for å setja i gang med store byggeprosjekt, og det merkast i næringa.

– Det har vore færre nybygg i 2024 enn me skulle ha ønska, og det startar litt småtøft også no i 2025, seier Ole Femsteinevik i O. Jacobsen Trelast på Hatlestrand.

Nesten alle bedriftene me snakkar med nemner at den økonomiske situasjonen fører til færre oppdrag med nybygg. Til gjengjeld har dei fått oppdrag innan rehabilitering, garasjebygg og tilbygg.

– Det er klart me merkar at det er mindre førespurnad etter nybygg. Samstundes har me hatt ei god auke i tilbygg og rehabilitering i 2024, så me har hatt arbeid heile tida. Det er litt meir krevjande planlegging og administrasjon når ein har mykje arbeidsfolk på mindre jobbar. Men me har klart oss fint, seier Kjell Ståle Tofte, dagleg leiar i Halsnøy Trelast.

Heldigvis går denne tonen også igjen hjå alle bedrifter me snakkar med. Dei har klart seg gjennom 2024 med den same arbeidsstyrken som før, og har ikkje måtta skjera ned på bemanninga. Det kan synast som om stemninga i Kvinnherad er meir optimistisk enn undersøkinga til NHO på nasjonalt plan vitnar om.

Lettare som liten?

– Det er kanskje lettare for små, lokale bedrifter som ikkje har så mange tilsette. Me har i alle fall hatt fullt belegg for alle våre tømrarar. Eg føler det losna litt i andre halvdel av 2024, for no er me i gang med fleire nybygg, og skal ut med prospekt snart, kan Roger Sjo i Øybygg AS på Halsnøy fortelja.

For Knut Geir Tofte i Kerf på Halsnøy er det éin trend som har redda drifta:

– Det er saunaer for fullt her. Me har bygt mange saunaer i tre som me leverer landet rundt, me nærmar oss vel 80 no. Dette har halde liv i oss i 2024.

Rune Myklebust i Lio Sag og Treforedling understrekar at situasjonen kanskje har vore lysare for dei, sidan dei ikkje held på med nybygg, men med detaljhandel, oppussing og garasjar.

– Me har stabil omsetnad år for år, og er godt nøgde. Det blir spanande å sjå om me får ei stor prisstigning i april, som er forventa. Det vil i så fall ikkje vera positivt for oss eller for kunden. Men me er ei lita bedrift som sparar pengar på å ordna alt av administrasjon sjølve, så me føler me har god kontroll og ser fram til vidare drift, smiler Myklebust over telefonen.

Auka kjøpekraft

Som mange andre, er folk i næringa spente på korleis renta vil oppføra seg i 2025. For Sandvoll Handel er det ikkje så lett å samanlikna drifta med tidlegare år, sidan 2024 var det første heile året dei har hatt tilsette tømrarar.

– Me har klart oss gjennom 2024 på ein god måte. Me driv ikkje med nybygg, men har hatt rehabilitering og garasjar og slikt. Eg trur 2025 vil bli bra. Me kan håpa på tre rentenedsetjingar i løpet av året, og lønsvekst til våren. Med auka kjøpekraft, trur eg det er fleire som vil nytta høvet til å få fiksa på eigedomane sine, seier Torgeir Rusten i Sandvoll Handel.

Sjølv om det er spådd at renta skal gå ned, er det ikkje alle som tek dét for gitt. Men i Lio Sag og Treforedling vel dei å vera optimistar sjølv om dei ikkje alltid stolar på økonomane.

– Det er mykje synsing rundt denne renta, det er ikkje alltid det stemmer det som «blårussen» seier. Men me held på som før uansett, og fokuserer på service til kunden. Eg er evig optimist!, konstaterer han.

Også på Hatlestrand er det gode nyhende:

– No har me både fleirmanns- og einebustader på gang. Så snart snøen forsvinn, kan grunnarbeidet starta opp, seier Ole Femsteinevik i O. Jacobsen Trelast.