Etterlyser arealplan frå kommunen
I byggebransjen har det vore nokre utfordringar dei siste åra, med høge renter og prisar på material. Men for Even Teigen i Byggern Teigen er det eit anna moment som har bremsa aktiviteten mest.
– Arealplanen skulle vel ha vore ferdig for nokre år sidan. Me har område for bustadfelt som er klare til å regulerast, men så lenge arealplanlegginga ikkje har vorte ferdig, kan me ikkje setja i gang med reguleringa, seier dagleg leiar Even Teigen.
Grenda har tatt ein prat med fleire bedrifter innanfor byggebransjen, og Teigen deler dei andre i bransjen sine erfaringar med at det har vore færre nybygg dei siste åra.
Annonse
– Det er nok litt grunna renta, men også manglande tilgang på attraktive tomter. Dei fleste som vil busetja seg i Kvinnherad, ser etter ei sjønær tomt. Det er det ikkje så mange igjen av i Kvinnherad.
Dreier mot bedriftsmarknaden
Det er nettopp slike tomter Even Teigen lenge har venta på å få sett ein reguleringsplan for.
– Ja, det er sjønære, attraktive tomter som me ynskjer å utvikla. Men det er ikkje vits i å føreta ein reguleringsplan dersom arealplanen skal seia noko heilt anna. Den har me venta på no i altfor mange år.
Annonse
Elles har bedrifta til Teigen klart seg bra gjennom dyrtida og dei høge rentene. Han fortel at dei har nokre større prosjekt som syter for nok arbeid til dei tilsette.
– Me har gjort ei større dreiing opp mot bedriftsmarknaden, til dømes med bygginga av Heradstun. I bedriftsmarknaden får ein gjerne prosjekt med ein litt lengre horisont. Så me har hatt ein god miks av store og små prosjekt, forklarar Teigen.
– Er du optimistisk for 2025?
– Ja, må no det. Dei seier jo at renta skal gå ned, så får me sjå om det stemmer. Men me har bra med arbeid no. Etter sommaren treng me nok fleire prosjekt igjen.
