Endeleg tilbake i full produksjon: – Ein skikkeleg stor dag
Etter ei tolv år lang reise på humpete veg, kunne Hydro Husnes tysdag feira at dei endeleg er tilbake i full drift, sterkare enn noko gong tidlegare.
Publisert
Sist oppdatert
– Vi har fleire gongar bestilt flybillettar for å koma hit og markera denne dagen, og no han endeleg komen. Dette er ein stor dag, sa konsernsjef Hilde Merete Aasheim i Hydro.
100 nye tilsette
Annonse
Saman med fleire sentrale personar i Hydro og representantar frå Industri Energi, Norsk Industri og Kvinnherad kommune, hadde konsernsjefen teke turen til aluminiumsverket på Husnes tysdag føremiddag. Det for å feira at B-hallen no er tilbake i full produksjon.
– Nærmare tolv år etter at vi stoppa opp er vi no endeleg tilbake i full drift. Vi har dobla produksjonsvolumet og har fått på plass 100 nye tilsette. Noko vi er utruleg nøgde med, og no er Hydro Husnes klare for mange nye år med produksjon av lågkarbonaluminium basert på fornybar kraft. Dette er ein skikkeleg stor dag, sa fabrikksjef Johan Berg før han gav ordet til leiar i Husnes Kjemiske Fagforeining, Ørjan Normann.
Sterkare saman
Ørjan har teke del i den mildt sagt turbulente reisa sidan omnane i B-hallen vart kalde tilbake 2009, og tok tysdag dei frammøtte gjennom litt av den tunge tida.
Annonse
– Denne bedrifta er meir enn berre ein arbeidsplass. Det å vera skiftarbeider her på denne hjørnesteinsbedrifta handlar om så mykje meir enn å berre stempla seg inn og ut. Det er ein livsstil, seier Ørjan og legg ikkje skjul på at det har vore tøft etter at finanskrisa slo inn i 2008.
– For sjølv om vi ikkje turte å seia det då, visste vi at spørsmålet ikkje var om vi klarte å berga B-hallen. Det var også ein kamp om å berga A-hallen. Heldigvis hadde vi ein norsk eigar som sa at vi fekk behalda éin hall. På grunn av det og ein kjempeinnsats frå alle dei tilsette, som har stått på gjennom desse tøffe åra, så er vi her i dag. Dette er eit kongeeksempel på at rett politikk fungerer, og at vi er sterkare saman, sa Normann.
Stolt konsernsjef
Konsernsjef Hilde Aasheim var sjølv med å stenga ned B-hallen i 2009, men ho var òg med på å senda inn investeringssøknaden på 1,5 milliardar kroner for å gjenopna B-hallen i si tid. Ein investeringssøknad som vart banka gjennom i 2017.
– Eg er veldig stolt av å stå her og seia gratulerer med dagen i dag. Eg vert rørt. Eg er veldig stolt over Hydro Husnes og måten de alle har takla den situasjonen de har stått i. De har stått på, vore lojale og jobba saman i ein vanskeleg situasjon. Det gjer inntrykk, og det er noko vi ikkje skal ta for gitt, sa Aasheim.
Etter ein seanse med både tilbakeblikk og snakk om framtida til Hydro og Hydro Husnes, fekk alle vera med på besøk inn i den B-hallen, som no går for full maskin, og til det nye støyperiet.
