Dobla omsetnaden i fjor: - Eit vanvittig godt år!
Norwater-sjefen Per Einar Gjerding kan visa til ein fantastisk omsetnad i 2024. Han forventar ikkje eit tilsvarande resultat i 2025.
– Me ser på det som litt ekstraordinært. I 2023 hadde me ein kjempebra omsetnad på 150 millionar kroner, i 2024 vart den dobla til omtrent 300 millionar!
Det har med andre ord vore stor aktivitet for selskapet, som leverer system for omvendt osmose, altså utvikling av ferskvatn frå sjøvatn. Dei leverer til ulike fartøy og riggar til sjøs.
Annonse
– Det handlar litt om teknologi for avlusing av laks i havbruksnæringa. Spesielt har kombinasjonen av våre produkt og ein mekanisk avlusar frå eit anna firma slått veldig an i brønnbåt-marknaden.
Effektivt
Gjerding legg ikkje skjul på at året har vore hektisk, men innteninga har likevel vore effektiv i forhold til ekstraarbeidet.
– Heldigvis har det vore bestilt større volum av same produkt, så sjølv om det har vore stor arbeidsbelastning på nokon, så har me kunna gjort mykje av produksjonen svært effektivt, seier han.
Annonse
Gjerding forventar ikkje det same resultatet i 2025. Men har trua på eit godt år i vente.
– Me har vel eit mål om å auka litt frå 2023-resultatet. 2024 gav heilt vanvittige tal, så me trur ikkje det skal gjenta seg. Men me har jo spanande ting som skjer i 2025 òg.
Ny produksjonshall
Det nærmar seg bygging av Norwater sin nye produksjonshall i Høylandsbygd, og Gjerding ser for seg at produksjonen startar der ein gong etter sommaren 2025.
– No er det full sving ute på tomta, der Brødrene Musland Maskin førebur grunnen for bygget. Me skal ha ei markering når hallen står klar, då må me ha ein opningsfest!, smiler Per Einar Gjerding.
