Bygde butikk på ein dag

Det blir no ein ordinær butikk, ein miniversjon av butikken i Odda. Hovudlageret er framleis der, men utvalet vil bli lika bra i Rosendal som i Odda.

– I tillegg til å ha utsal, reinsar vi gjerne brudesølv og liknande. Vi har også gullsmed som kan reparera øydelagde smykkar, og vi vil på sikt tilby byting av batteri, seier Anette Stråbø Melkeraaen.

Bygd på ein dag

Torsdag var den nye, permanente butikken på plass i gamlebanken i Rosendal. Kvelden før haldt dei framleis på å gjera klart til opning.

– Vi hadde våre timar i går, hyllene var ikkje skrudd opp før klokka sju, og vi hadde mange varer å pakka ut, prisa, merka og setta på plass, seier Anette.

Ved opning har dei ein del varer på lager som framleis ikkje er sett fram, og dei manglar nokre småting som betre belysning og profilering på vindauga før alt er som det skal. Dei har derimot ordna det viktigaste – varer, kassaapparat og kundar. Medan Grenda er på besøk er det fleire som er innom for å forvita seg, og det blir til og med gjort nokre sal.

«Dei fyrste kundane som handlar over 250 får ein goodie-bag» sto det i invitasjonen til opning. Medan eg pratar med Anette inne på visningsrommet er det ei som handlar for 249, kr. -Om du kjøper ein pose òg, så får du deg ein slik ein godtepose, ropar Anette ut til kunden. Ho slår til.

Stemninga er god hos Berg Gull og Sølv og dei tre damene bak disken er tydelig nøgde med avgjersla om filial i Rosendal.

– Vi er veldige glade for alle dei gode tilbakemeldingane vi fekk i sommar. Vi gjekk jo litt hardt ut og sa at det kom an på lokalbefolkninga korleis det kom til å gå, men det har vore over all forventing, seier Annelin Johannessen.

– Det er ei veldig kjekk og positiv bygd, skyt Anette inn.

– Fantastisk service!

Variert tilbod

Damene i gullsmedforretninga vil òg kunne tilby eit eige visningsrom, sett av for dei gongene ein kanskje vil halda det ein kjøper litt hemmeleg. Her kan ein avtala privat visning både på dagtid og kveldstid.

– Spesielt når ein skal fri er det kjekt at ikkje heile bygda veit det før ho eller han som skal seie ja. Dermed har vi laga til eit eige rom for det, seier Anette lattermildt. Dette har vist seg å vere populært i Odda, og ho voner det fell i smak i Rosendal òg.

I tillegg vil dei tilby spray tan og behandling for både vipper, bryn og negler. Dei tre siste tilboda er det Annelin som står for.

– Vi vil laga til ein eigen velværeavdeling, kor vi gjerne tek imot utdrikkingslag eller dei som vil ha ein ekstra kjekk jentekveld. Det blir ved avtale, på kveldstid, seier Annelin, som er utdanna negledesignar.