Aukande turisme i Hardanger i 2024

«Med 8 % vekst i kommersielle overnattingar, og sterk etterspurnad både nasjonalt og internasjonalt, har 2024 vist at Hardanger står sterkt som reisemål», skriv dei i julekortet sitt, som er underskrive av direktør Andreas Skogseth og dei tre andre tilsette.

Visit Hardangerfjord kan fortelja at norske, tyske og nederlandske gjestar toppar besøksstatistikken, men ein ser også ein auke i oversjøiske marknader som USA og Kina. Den europeiske marknaden har vist sterk interesse for Hardanger i 2024. Reiselivet genererer no over 1,5 milliardar kroner og sysselset meir enn 1500 personar i regionen.

Aktivt PR-arbeid

Initiativet til Visit Hardangerfjord kom i 2020, med mål om å styrka samarbeidet mellom kommunar, næringsliv og lokalbefolkning i kommunane Eidfjord, Ulvik, Ullensvang, Kvam og Kvinnherad. Visit Hardangerfjord vil vera ein pådrivar i arbeidet med å utvikle ein felles reiselivsstrategi for Hardanger-regionen.

Dei understrekar at den gode utviklinga i 2024 er eit resultat av sterke reiselivsprodukt, felles innsats i utviklings- og marknadsarbeid, og globale reiselivstrendar som etterspør opplevingar som Hardanger kan by på.

I pressemeldinga går dei gjennom kva arbeid dei har gjort av marknadsføring på nettsida, i sosiale medium, gjennom influensarar og i presse. Blant høgdepunkta er internasjonale pressemeldingar om Kygo si albumlansering på Trolltunga og rekordbryllaup på same ikoniske attraksjon.

Dei nemner òg bidrag til sendingar som mellom anna God Morgen Norge og Tour of Norway, som begge har løfta fram regionen på nasjonalt nivå.

«Slik medieomtale er ein viktig del av vårt arbeid med å auka kjennskapen til Hardanger som reisemål», slår dei fast.

Heilårs-arbeidsplassar

Trykksaker som Hardangerkartet og Hardangerfjord Guide er det Visit Hardangerfjord som står for. Kvart år distribuerer dei fleire hundre tusen eksemplar frå lageret i Norheimsund til mellom anna innfallsportane i Hardanger, medlemsbedrifter og turistkontor over heile Noreg.

«Desse trykksakene bind saman regionen og bidreg til auka opphald og ferdsel på tvers av kommunegrensene. Me ser fram til å lansere oppdaterte utgåver for 2025, som vil fortsetja å vera ettertrakta blant turistane», står det å lesa.

Vidare vil Visit Hardangerfjord samla heile regionen under ein felles visjon, og styrka Hardanger sin posisjon som eit av dei mest attraktive reisemåla i Noreg. Strategien deira legg vekt på mellom anna heilårsturisme, berekraft og auka opplevingsverdi. Dei vil bidra til å redusere sesongvariasjonar og utvikla stabile heilårs-arbeidsplassar.

«Prognosane for 2025 er lovande, og me ser fram til å byggje vidare på årets suksess.», står det å lesa i julekortet.