Møte etter ferjeklage

Ordføraren i Ullensvang kommune tykkjer problema på sambandet Jondal-Tørvikbygd i førre veke er uakseptable. Han sendte difor inn klage, og saka vart tema på eit møte mellom Fjord1 og Skyss.

Førre torsdag mista MF «Samlafjord», som går i sambandet Jondal-Tørvikbygd, framdrifta. Som kjent tok Fjord1 då MF «Solskjel» ut av ruta Årsnes-Varaldsøy-Gjermundshamn, for å slepa «Samlafjord» til Fjellstrand i Oma. Dagen etter skulle MF «Eresfjord» overta, men også den ferja fekk tekniske problem, og Fjord1 måtte finna endå ein reserve.

Ifølgje Hardanger Folkeblad sendte ordførar Roald Aga Haug (Ap) i Ullensvang kommune allereie fredag kveld ein klage på situasjonen til fylkesordføraren og direktøren i Skyss.

– Ved eit så sårbart og sterkt trafikkert samband må pendlarar og andre reisande sikrast overfart til rett tid i tråd med rutene. Det må difor sikrast tilstrekkeleg beredskap umiddelbart og permanent. Etter svikten som no har vore må reserveferje/to ferjer vere tilgjengeleg. Vi bed difor om at den uakseptable situasjonen blir løyst med robuste tiltak, skreiv han.

Hardanger Folkeblad opplyser vidare at Skyss og Fjord1 hadde eit møte om mellom anna denne saka på tysdag.