Trond Mohn har kome med ei varm førejulsgåve til Rosendal Turnlag. Går det som laget no ynskjer, vil ikkje stadion sjå slik ut i 2021. (Arkivfoto)

Mohn med ny milliongåve til Rosendal Turnlag

Rosendal Turnlag har fått ei førejulsgåve i millionklassen av Trond Mohn. Det betyr at dei no satsar for fullt på å kunna tilby eit heilt nytt stadionanlegg i bygda innan 2021.

I mars 2018 skreiv Grenda at Rosendal Turnlag hadde fått ei påskegåve i millionklassen frå Trond Mohn til deira arbeid med å etablera fast dekke på Rosendal Stadion. Sidan då har ikkje berre prosjektet blitt forseinka, men det er òg blitt betydeleg dyrare enn fyrst venta.

Artikkelen held fram under annonsen.

Som igjen betydde at turnlaget ikkje fekk råd til nytt lagerbygg, nytt servicebygg, toalett, kiosk, ny overbygd tribune og nytt dekke på kunstgrasbanen.

- Dette tok eg opp med Trond Mohn under eit besøk hos han nyleg. Eg fortalde at Rosendal Turnlag blir 120 år i 2021, og at det ville vore veldig kjekt og då kunna tilby eit heilt nytt og komplett stadionanlegg, seier leiar Jostein Hatteberg i Rosendal Turnlag.

 

Heilt ny stadion til jubileet

Trond Mohn lytta til det turnlagsleiaren hadde å seia, og kan no gle heile laget med at han går inn og forskotterer spelemidlar, kommunalt tilskot og momskompensasjon. Summar verd fleire millionar kroner.

Jostein Hatteberg. Arkivfoto.

- Det er fantastisk. Denne gåva gjev oss høve til å realisera ting tidlegare, og om alt går slik vi ynskjer og om vi får lov å utføra arbeidet på ein kostnadseffektiv måte, så skal vi kunna tilby eit heilt nytt stadionanlegg med friidrettsbane, oppvarmingsareal, kunstgrasbane, lager, servicebygg og tribune til jubileet i 2021, seier ein svært nøgd Jostein.

 

Heldige

Artikkelen held fram under annonsen.

Arbeidet med å etablera fast dekke på løpebanen startar like over nyttår og skal stå ferdig 1. juli 2020.

Planane om ny idrettshall i bygda er ikkje med i dette prosjektet, men Jostein Hatteberg fortel at det er ein god dialog med Trond Mohn også på det prosjektet.

- I det heile er vi i Rosendal Turnlag veldig heldige som har Trond Mohn med oss på laget. Vi gler oss stort til arbeidsoppstart og til å sjå anlegget ferdig. Det gjer også Trond Mohn, som ynskjer idrettsvener i Rosendal ei retteleg god jul, seier Jostein.