Minneord Geir Aage Mogren – økonomisjef i Kvinnherad kommune

Søndag fekk vi den triste meldinga om at vår gode kollega og ven, økonomisjef Geir Aage Mogren, var død. Han vart 62 år gamal. Det er ein markant skikkelse i organisasjonen som no er borte. Både politisk nivå og tilsette i administrasjonen har gjennom mange år blitt godt kjent med og lært å setja stor pris på Geir.

Geir kom saman med familien til Rosendal i 1992. Han vart då tilsett som økonomisjef i kommunen, ei stilling han hadde heilt fram til han døydde. Etter å fullført utdanning i historie, arbeidde han som lærar nokre år før han studerte på kommunalhøgskulen på midten av 80-talet. Etter studiet arbeidde han ei tid i heimkommunen Stjørdal, deretter i Egersund kommune, før turen gjekk til Rosendal og Kvinnherad kommune.

Vi som kjente Geir likte godt å vera saman med han. Han hadde høg kompetanse og var god å ha med i leiargruppa vår. I tillegg til å ha oversikt over overordna kommuneøkonomi og kraftfondsutvikling, gav han råd og hjelp til leiarane våre i budsjettspørsmål og laga saman med dei andre tilsette i «Budsjett og økonomi» rapportar, planar og styringsdokument for organisasjonen.

Han likte godt å presentera dokumenta i politiske møte og utveksla erfaringar knytt til statistikk og tall. Han var også eit friskt pust i arbeidsmiljøet på rådhuset. Han hadde alltid ein kommentar på lur, og det var som regel latter rundt han, anten han sat på sin faste plass i kantina eller på kontoret sitt i 2. etasje. Gode kommentarar gjekk både til ordførar, politikarar, kollegaer eller gjester på rådhuset. Dersom Rosenborg vann og Brann tapte var han ekstra «på».

Bridge var ein viktig hobby for Geir, og kollega Sigbjørn Øye var hans faste makker. Når Geir kom på jobb torsdags morgonar etter onsdagens bridgerunde,  gjekk det ikkje lang tid før vi forstod korleis det hadde gått. Kommentar i medgang var at «det gjekk bra til tross for makker», medan det i motgang sjølvsagt var makkeren sitt spel som var grunnen – alt sjølvsagt med eit glimt i auga.

På sin måte viste Geir omsorg for dei han hadde rundt seg. Han var hjelpsam, og han var ein god drøftingspartner som ofte hadde nyttige råd og tankar som han delte. Han var oppteken av korleis kollega rundt han hadde det, og også korleis deira næraste hadde det.

Når han skulle bli pensjonist hadde Geir planer om å få meir tid til slektsgransking. Dette var ei stor interesse hos han, og med meir tid skulle han koma enda lenger. Slik vart det diverre ikkje, men også innan slektsgransking har han vore til hjelp for andre som hadde eit ynskje om å finne eigne røter. For Geir var det også her meiningsfullt å vera til hjelp for andre.

Geir var kunnskapsrik. Han las mykje, og var samfunns- og historieinteressert. Når han fekk høve til å delta i quiz gjorde han meir enn gjerne det. Ifylgje Geir hadde quizlaget hans «Geir og damene» ei arbeidsfordeling der han deltok med kunnskap og damene kasta glans!

Arbeid med val var noko av det kjekkaste Geir visste i jobbsamanheng. Få, om nokon, hadde så mykje kunnskap om val som han. Stortingsval var spanande, men framfor alt var det kommuneval som engasjerte han. Han analyserte, lagde kalkylar og forklarte til alle som ville høyre på. Det var ikkje utan grunn han fekk tittelen «Valgeneral» i Kvinnherad. Heile veka før han døydde sytte generalen for at valet blei gjennomført på lovleg måte i Kvinnherad, og han fullførte protokollane som gjekk til fylket siste dagen på jobb.

Som kollega såg vi at Geir i periodar hadde helsemessige utfordringar. Til tross for dette klaga han aldri. Han var til stades på jobb i 100% stilling, og me såg at han treivst i arbeidsmiljøet. Vi vil sakne han djupt, både fagleg og sosialt. Framfor alt går våre tankar til hans næraste familie. Geir etterlet seg kona Rannveig og barna Thale, Ane og Harald. Vi lyser fred over Geir sitt minne.

 

Av Kommunedirektøren si leiargruppe