Merethe har laga årets norske dokumentarfilm

Merethe Offerdal Tveit vart verkeleg teken på senga då namnet hennar vart ropt opp som prisvinnar i kategorien «Beste norske dokumentar» under Biff si prisutdeling torsdag kveld.

– Så utruleg kjekt. Det er veldig stort. Eg hadde ikkje fanari at eg var ein kandidat eingong. Og var eigentleg hundre prosent sikker på at eg ikkje kunne vinna, seier filmskaparen til Grenda.

Prisen får ho for dokumentarfilmen «Odelsgut og Fantefølge». Merethe sin første heilaftans dokumentarfilm som så langt har hatt to visningar under filmfestivalen i Bergen.

– Eg synest det var stort nok i seg sjølv å bli plukka ut til Biff. Og hadde verkeleg ingen tankar om at det skulle koma noko meir ut av det. Eg konkurrerte med så utruleg mange gode filmar, og såg verkeleg ikkje korleis eg skulle gå til topps, seier Merethe.

 

Hadde alt juryen såg etter

Men det gjorde juryen. Dei fann nemleg alt det dei leita etter i Offerdal Tveit sin film.

«Vi har ikkje sett nokon dårlege filmar, men vi har sett ein som har alt vi såg etter. Ein gjennomført god film med godt handverk, vakkert visuelt uttrykk og ein drivande historie som involverer og engasjerer. Vi har blitt tatt med på ei reise som har lært oss noko nytt. Om menneske, fordommar, overmot, elitisme, populisme, samhald og kunst. Bileta i filmen er som ei utstilling i seg sjølv, menneska vi møter fortel noko om oss sjølv. Ingen er berre rause og ingen er berre forutinntatt. Den er ei god påminning om at ingenting er som det ser ut til ved første augekast. Det er også ei veldig god beskriving av kvifor det faktisk ikkje nyttar å berre komma her og komma her. Også er det ingen skam å snu. Utan at det er eit krav å driva og snu heile tida.» skriv juryen.

 

– Heilt sprøtt

I tillegg til heider og ære får Merethe ei pengegåve på 25.000 kroner i premie.

– Pengane har eg ikkje tenkt så mykje på. Det er fantastisk at det er pengegåve òg, men det er definitivt prisen og det faktum at min film vart plukka ut i dette gode selskapet som er viktigast. At så mange får vita kven eg er og kva eg er god for betyr mykje. Det er beste norske dokumentarfilm, det er jo heilt sprøtt. Det blir laga mykje bra her til lands, så dette er stort, seier Merethe.

Prisen vart feira med champagne torsdag kveld, men den verkelege feiringa blir fredag.

– Då får eg besøk av alle mine frå Kvinnherad som kjem for å sjå det som blir den skikkelege premierevisninga av «Odelsgut og Fantefølge». Og no kan vi feira pris i tillegg, det gler eg meg til, sluttar Merethe.