Meisterklasse med Leif Ove Andsnes

For mange er det både ukjent og litt mystisk korleis musikarar jobbar for å finna heilt særeigne uttrykk. No lettar Leif Ove Andsnes og Jan Jiracek von Arnim på sløret.

I morgon kan du sjå dei to verdsstjernene undervisa seks store pianotalent i Riddarsalen på Rosendal Avlsgård frå klokka 12 til klokka 18. Meisterklassane er opne og gratis for publikum, og om kvelden vert det konsert med dei seks talenta.

– Dei som vil følgja undervisinga er hjarteleg velkomne. Publikum kan verkeleg gleda seg. Sjølv om dei unge talenta ikkje er så kjende, spelar dei på eit utruleg høgt nivå, fortel Leif Ove Andsnes.

Beethoven-sonatar

Dei seks studentane kjem frå Canada, Israel, Korea, Japan, Noreg og Sverige. Andsnes byrja å undervisa dei i går, og veka byggjer opp mot konserten i Riddarsalen onsdag kveld, samt konsert på Festspillene i Bergen på fredag. Tema er pianosonatar av Beethoven.

– Alle har førebudd seg på desse sonatane. Eg underviser dei i tre timar, og så er det Jan Jiracek von Arnim frå Wien sin tur. Under konserten om kvelden kjem eg til å introdusera talenta og fortelja om meisterklassane, seier Andsnes.

Med åra har pianisten opparbeidd seg mykje kunnskap om musikk og formidling, og dei siste åra har lysta til å formidla dette vidare blitt større.

– Eg har lært av mine læremeistrar. Stoffet må overleverast frå generasjon til generasjon. For om lag ti år sidan tenkte eg at eg var klar til å formidla vidare det eg hadde lært, fortel pianisten.

Formidlingsglede

Han synest det er naturleg å dela kunnskapen han har bygd opp. Andsnes har ingen faste studentar, men likar å halda kurs. Han vert ofte spurd om å undervisa når han held konsert på ein skule.

– Kvar generasjon føler ting på ein ny måte, men vi driv med gamal musikk og det er uansett ei overlevering av ein tradisjon vi driv med, seier Andsnes.

Han fekk sjølv undervising på Jiri Hlinka sitt pianoakademi for vidarekomne studentar, og då Hlinka gjekk av med pensjon overtok Andsnes, Håvard Gimse og Christian Ihle Hadland kursverksemda. Kurset denne veka er det Andsnes som har ansvar for. I tillegg til Andsnes og von Arnim kjem pianolegenda Richard Goode frå USA inn som gjesteprofessor.

– Litt av filosofien med desse kursa er å ha opne øvingar, slik at studentane kan høyra på kvarandre. Interesserte publikummarar og andre musikarar som er nyfikne kan også få med seg korleis dette føregår. Mange set pris på å sjå og få eit innblikk i korleis musikarar jobbar for å uttrykkja kjensler gjennom musikken, seier Andsnes.

– Og korleis formidlar du kunnskapen din vidare til dei unge talenta?

– Eg brukar språket, eg syng, spelar og dansar. Innan musikken kan ein bruka dei hjelpemidla ein har til rådvelde for å visa kva musikken uttrykkjer, fortel han.