Vindkraft i Kvinnherad: – Årlege inntekter i 100 millionars-klassen

Energikommisjonen som la fram sin rapport for eit par år sidan, konkluderte med at Norge innan få år treng 80 Twh fornybar kraft i tillegg til dei 150 som blir produsert i dag. Dette er det mange betrevitarar som har andre meiningar om. Same kva vi kunne og kan gjera, er det alt i dag eit faktum at mange industriprosjekt står på vent på grunn av kraftmangel.

For nokre år sidan blei kommunane pålagde å peika ut område som kunne eigna seg til vindkraftutbygging. Vår dåverande kommunedirektør var dristig nok til å føreslå fjellplatået mellom Matersfjorden og Åkrafjorden. Dei negative argumenta var overveldande, og forslaget blei nedstemt til liks med alle andre areal i kommunen.

100 millionars-klassen

Eg er samd i at det er få areal det er tilrådeleg å byggja vindmøller på i Kvinnherad, men eg har vanskar med å kjøpa mange av dei argumenta som blei framsette mot Matre-Åkra. Eg er sjølv lite kjend på dette fjellplatået, og eg vil tru at det stort sett berre er grunneigarane sjølve og e-verksfolka som vedlikeheld høgspentlinja gjennom arealet, som kjenner området. Parallelt med høgspentlinja på fjellet går stamlinja Blåfalli-Sauda, gjennom Åkradalen. Denne er det no aktuelt å rusta opp til 420 KV-linje.

Området det var snakk om til eventuell vindpark ligg på fjellryggen mellom Bauge og Hegglandsdalen. Det utgjer 13-14 km2 og ligg mellom 600-700 moh. Eg vil tru at det kanskje kunne byggjast ut vindkraft tilsvarande 1 Twh eller 1 000 000 000 kwh på dette arealet. Ei utbygging her vil kunna generera årlege inntekter i 100 millionars-klassen, fordelt på kommunen, grunneigarane og utbyggjar. Og det utan at meir enn nokre få kvinnheringar treng sjå ei mast langt i det fjerne frå sitt hus. Du må til Kyrping, Skånevik eller Utåker for å sjå master slik vi ser mastene på Fitjarheiane i fint vêr einskilde stader i Kvinnherad.

Roma midt imot

Tilkomst til dette området kan by på utfordringar. For å koma fram med store turbinar krevst det høg vegstandard. Eg ser for meg nytt kaianlegg like nordanfor ferjeleiet i Matre, 2 km tunnel herifrå til Bauge, og veg i dagen inn dalen og vidare opp til platået.

Det er vel som å tala Roma midt imot å rippa opp i denne saka. Vindkraftutbygging møter mykje motstand i mange kommunar, men eg meiner det må finnast stader i dette landet der vindmøller vil vera meir til nytte enn til skade. Det kan mellom anna medføra opning av nye friluftsområde. Dersom mange nok kommunar seier nei til vindkraft, er det vel stor fare for at regjeringa ser seg nøydd til å fråta kommunane den vetoretten dei har i dag.

Rosendal, 15.12.2024

Olav Birger Espeland