Vi treng barnehageplassane våre, og vi treng dei der vi bur

Vi i FAU Undarheim barnehage får høyre at det vert sagt av fleire at dei var overraska over støtta til skrivet «Me vil ikkje ha storbarnehage. Me vil ikkje ha storskule» og videre at dei kjem med uttalar som at vi «grov vår eiga grav» i forhold til nedlegging av Undarheim barnehage.

Vi vil med dette komma med ein aldri så liten klargjering: at vi støttar andre i å få ha borna sine i ein barnehage eller skule i nærområdet tyder IKKJE det same som at vi IKKJE ynskjer det for våre eigne born. Vi forstod ikkje at samhald med dei andre skulle føre til at vår eigen barnehage automatisk vart utsett. Vi tenker det same som andre foreldre, vi ønsker at born skal få gå i barnehage i nærområdet.

Når det er med ein slik ordlyd enkelte omtalar at Fau i ein barnehage på Husnes støttar andre foreldre som ønsker barnehagar i nærleiken, skjønar me straks meir av utfordringa med å lage eit samhald på tvers av bygdene. Korleis jobbe for å knyte bygdene saman når vi vert satt opp mot kvarandre på denne måten? Det er mange gode grunnar til å behalde Undarheim barnehage, kanskje òg framfor andre barnehagar, men vi ønskjer ikkje å medverke til ein sånn diskusjon. Vi skjønar at prioritering er vanskeleg, at ein i Kvinnherad sit att med mange barnehage- og skulebygg som har eit skremmande stort vedlikehaldsetterslep. Det vi ikkje skjønar er korleis å legge ned ein barnehage for å spreia ungane i andre barnehagar med lite tilfredsstillande standard, kan være framtidsretta og med på å lage ein betre barnehage for borna.

Samtlege av oss i FAU Undarheim barnehage er personar som har flytta attende til kommunen etter fleire år andre stadar. Vi er kommen heim att og valte å busette oss på Husnes. Vi tillèt oss å gjenta oss sjølv frå førre skriv om same tema: Bur ein på Husnes kan ein levere i barnehagen, gå innom legen, handle og dra på jobb utan å være i behov av bil. Personar som vel å busette seg på Husnes vel dette av mange grunnar, nærleik til ulike tenester i tillegg til barnehage, skule og arbeidsstad er ein av dei.

Undarheim barnehage er ein barnehage for alle. Det er mangfald, trivsel og glede blant dei som jobbar der, sameleis for borna. Dersom vi framleis ikkje har fått det fram: vi ønsker at våre born skal få fortsette å gå i barnehage der vi bur. Vi treng den gode barnehagen vår, vi treng barnehageplassane våre, og vi treng dei der vi bur.

FAU Undarheim barnehage