Vegstandarden i Kvinnherad – ynskjer uttale frå fylket

Ope brev til Vestland fylkeskommune, med kopi til Kvinnherad kommune. Til ansvarlege for vegstandard og vedlikehald:

NAF Haugesund & omegn - gruppe Kvinnherad har gjennomført ei synfaring av vegstandarden på to sentrale strekningar i kommunen: Reset - Utåker og Halsnøytunnelen - Ranavik ferjekai. Målet med synfaringa har vore å avdekkja kritikkverdige forhold, og å peika på nødvendige tiltak for å sikra tryggare og betre framkome for alle trafikantar.

Brote saman

1. Strekning Reset – Utåker:

* Det er registrert generelt dårleg vegdekke på heile strekninga frå Valen til Utåker, sjølv om nokre av områda er lappa, er dei mellombelse reparasjonane likevel ikkje tilstrekkelege over alt.

* På fleire stader har vegskuldrane brote saman, og det er tydeleg behov for meir omfattande arbeid. Problemet kan ikkje løysast med enkle overflateutbetringar, men krev at grunnarbeidet blir teke opp att og vegskuldrane bygd opp på nytt.

Store vassdammar

2. Strekning Halsnøytunnelen - Ranavik ferjekai:

* Det er observert fleire store vassdammar som strekkjer seg inn i vegbana, noko som skapar farlege køyreforhold. Dette tyder på at vegen ligg lågare enn omgjevnadene, og at dreneringa i grøftene ikkje er tilstrekkeleg.

* På fleire stader langs denne strekninga er det stor høgdeforskjell mellom veg og grøft. Dette forsterkar faren for skade på køyretøy dersom ein kjem utanfor vegbana. Bilspor langs vegen tyder på at dette er eit reelt problem.

* I tillegg til manglande drenering og utilstrekkeleg breidde, er vegdekket også fleire stader i svært dårleg forfatning, noko som aukar risikoen for ulykker.

Snarast

Vi ber Vestland fylkeskommune om å:

1. Gjera ei grundig vurdering av vegstandarden på dei nemnde strekningane.

2. Prioritera varige tiltak for å utbetra vegdekke, vegskuldrar og drenering.

3. Sikra at strekningane har tilstrekkeleg breidde og tryggleik for passering av to bilar.

Trafikktryggleiken på desse vegane er avgjerande for både lokalbefolkninga og tilreisande.

Vi forventar at nødvendige tiltak blir sette i gang snarast, og vi stiller oss gjerne til disposisjon for vidare dialog om saka.

Vi ønsker tilbakemelding om planlagde tiltak.

Med venleg helsing

NAF Haugesund & omegn - gruppe Kvinnherad

Karl Petter Vårdal

Husnes 9. januar 2025